কংগ্ৰেছ নেতা ৰাহুল গান্ধীক অপমানসূচন মন্তব্য কৰাৰ অভিযোগত অসমৰ মুখ্যমন্ত্ৰী হিমন্ত বিশ্ব শৰ্মাক অপসাৰণ কৰিবলৈ প্ৰধানমন্ত্ৰী নৰেন্দ্ৰ মোদীক দাবী জনালে তেলেংগানাৰ মুখ্যমন্ত্ৰী কে চন্দ্ৰশেখৰ ৰাও (কেচিআৰ)য়ে।
মুখ্যমন্ত্ৰী শৰ্মাৰ বক্তৱ্য সন্দৰ্ভত প্ৰশ্ন উত্থাপন কৰি ৰাওৱে প্ৰশ্ন কৰে, ‘’মোদীজী! এয়া আমাৰ ভাৰতীয় সংস্কৃতিনে? এয়াই আমাৰ বেদ, মহাভাৰত, ৰামায়ন আৰু ভগৱদ গীতাই শিকাইছেনে? মই বিজেপিৰ সভাপতি নাড্ডাজীক সুধিছো, এয়া আমাৰ ভাৰতীয় সংস্কৃতিনে?’’
তেওঁ লগকতে কয়,’’এখন ৰাজ্যৰ এগৰাকী মুখ্যমন্ত্ৰীয়ে এনেদৰে কথা ক’ব পাৰেনে? আপুনি শীঘ্ৰেই তেওঁক অপসাৰণ কৰক। এটা সীমা থকা উচিত। আপুনি অহংকাৰী নেকি? তামাচা কৰিছে? আপুনি মানুহে মনে মনে থাকিব বুলি ভাৱে?’’
উল্লেখ্য যে শুকুৰবাৰে মুখ্যমন্ত্ৰী হিমন্ত বিশ্ব শৰ্মাই উত্তৰাখণ্ডত এক নিৰ্বাচনী সভাত ৰাহুল গান্ধীৰ বিৰুদ্ধে কিছু ‘আপত্তিজনক’ মন্তব্য কৰিছিল।
তেলেংগানাৰ মুখ্যমন্ত্ৰীগৰাকীয়ে লগতে কয়,’’এয়া বিজেপিৰ সংস্কৃতি নেকি? এয়া হিন্দু ধৰ্ম আৰু ভাৰতীয় সংস্কৃতি? মই এগৰাকী ভাৰতীয় হিচাপে দাবী কৰিছো। মই লজ্জিত অনুভৱ কৰিছো। এয়া দেশখনৰ বাবে ভাল নহয়। আপুনি ভাবে নেকি যে আমি হাত সাৱটি বহি থাকিম?’’
