কাশ্মীৰত সন্ত্ৰাসবাদীৰ অতৰ্কিত আক্ৰমণ : দুজন নিৰাপত্তাৰক্ষী জোৱান নিহত, কেবাজনো জোৱান আহত
বিগত কেবা মাহৰ পৰা বিক্ষিপ্তভাৱে অশান্ত হৈ পৰিছে জন্মু আৰু কাশ্মীৰ। বিগত কিছু মাহৰ পৰা জন্মু আৰু কাশ্মীৰৰ বিভিন্ন ঠাইত নিৰাপত্তাৰক্ষীলৈ লক্ষ্য কৰি আক্ৰমণ সংঘটিত কৰি আহিছে সন্ত্ৰাসবাদীয়ে।
আজি দিনৰ ভাগতো কাশ্মীৰত নিৰাপত্তাৰক্ষীৰ ওপৰত অতৰ্কিত আক্ৰমণ কৰে সন্ত্ৰাসবাদীয়ে।
ঘটনাৰ বিৱৰণীৰ মতে সোমবাৰে (আজি) দুপৰীয়া ১২.৫০ মানত পাম্পোৰে বাইপাছত হঠাতে আৰক্ষী আৰু নিৰাপত্তাৰক্ষীৰ যৌথ বাহিনীলৈ লক্ষ্য কৰি গুলীচালনা কৰে সন্ত্ৰাসবাদীৰ এটা দলে।
উক্ত আক্ৰমণত দুজন চি আৰ পি এফ জোৱান নিহত হোৱাৰ লগতে অন্য পাঁচজন জোৱান আহত হৈছে।
#UPDATE Of the five CRPF jawans, who were injured after terrorists fired upon the Force’s road opening party (ROP), two jawans lost their lives. More details awaited. #JammuAndKashmir https://t.co/zIZ5pHKXw2
— ANI (@ANI) October 5, 2020
ইতমিধ্য আহত জোৱানকেইজনক জিলা অসামৰিক চিকিৎসালয়ত চিকিৎসাৰ বাবে ভৰ্তি কৰোৱা হৈছে।
বাতৰি প্ৰস্তুত কৰি থকা পৰ্যন্ত আক্ৰমণকাৰী সন্ত্ৰাসবাদীৰ পৰিচয় জানিব পৰা হোৱা নাই।
ইফালে সূত্ৰৰ খবৰ মতে, পাম্পোৰে বাইপাছৰ ৰাস্তা খোলাৰ কামত ব্যস্ত আছিল নিৰাপত্তাৰক্ষীসহ এটা আৰক্ষীৰ দলটো। উক্ত দলটোলৈ লক্ষ্য কৰিয়ে সন্ত্ৰাসবাদীৰ দলটোৱে নিৰ্বিচাৰে গুলীচালনা কৰি পলায়ন কৰে।
ঘটনাৰ পিছতে সন্ত্ৰাসবাদীৰ সন্ধানত অভিযান আৰম্ভ কৰিছে আৰক্ষী আৰু নিৰাপত্তা বাহিনীৰ যৌথ বাহিনীয়ে।
উল্লেখ্য যে, জন্মু আৰু কাশ্মীৰৰ ৰাষ্ট্ৰীয় ঘাইপথটো নিৰাপত্তাজনিত কাৰণত যাতায়াত বন্ধ ৰখা হৈছে।
স্মৰ্তব্য যে, বিগত কিছু মাহৰ পৰা সন্ত্ৰাসবাদীয়ে সঘনাই নিৰাপত্তাৰক্ষীৰ ওপৰত আক্ৰমণৰ ঘটনা সংঘটিত কৰি আহিছে, যাৰ ফলত কেবাজনো নিৰাপত্তাৰক্ষী ছহিদ হৈছে।