বিজেপিত আৰম্ভ বিদ্ৰোহ : তেজপুৰৰ সাংসদ ৰাম প্ৰসাদ শৰ্মাৰ পদত্যাগ
বিজেপিৰ পৰা পদত্যাগৰ কথা ঘোষণা কৰিছে তেজপুৰৰ সাংসদ ৰাম প্ৰসাদ শৰ্মাই। ছ’চিয়েল মিডিয়াৰ জৰিয়তে বিজেপি সাংসদগৰাকীয়ে আজি তেওঁৰ পদত্যাগৰ কথা ঘোষণা কৰিছে।
আসন্ন লোকসভাৰ নিৰ্বাচনত টিকটৰ পৰা বঞ্চিত হৈয়ে দলৰ প্ৰাথমিক সদস্য পদৰ পৰা পদত্যাগ কৰাৰ সিদ্ধান্ত গ্ৰহণ কৰা বুলিও সাংসদগৰাকীয়ে উল্লেখ কৰিছে।
‘’আৰএছএছ আৰু বিশ্ব হিন্দু পৰিষদক ১৫ বছৰ তথা বিজেপিক ২৯ বছৰ সেৱা কৰাৰ পাছত এতিয়া মই বিজেপিৰ প্ৰাথমিক সদস্য পদৰ পৰা পদত্যাগ কৰিলো।‘’ফেচবুক প’ষ্টটোত সাংসদ শৰ্মাই এইদৰে কয়।
তেওঁ লগতে কয়,’’ মোৰ নামটো এগৰাকী বৰ্তমানৰ সাংসদ তথা অসম গোৰ্খা সন্মিলনৰ সভাপতি হিচাপে বিজেপিৰ ৰাজ্যিক সমিতিয়ে প্ৰেৰণ কৰা পেনেলত স্থান লাভ নকৰাত মই খুবেই অপমানিত বোধ কৰিছে।‘’
আনহাতে, মোৰ বন্ধু আৰু অসমৰ জনসাধাৰণ তথা মোৰ সমষ্টিবাসী ৰাইজক মোৰ জীৱনৰ শেষ সময়লৈকে সেৱা আগবঢ়াই যাম বুলি উল্লেখ কৰি সাংসদ ৰাম প্ৰসাদ শৰ্মাই কয়,’’মই আপোনালোকৰ সুদীৰ্ঘ দিন ধৰি মোৰ প্ৰতি আগবঢ়োৱা মৰম আৰু সহযোগক সদায় মনত ৰাখিম। মই আপোনালোকক অন্তৰৰ গভীৰৰ পৰা ভাল পাওঁ।‘’
ইপিনে, সাংসদ গৰাকীয়ে আজি দিনৰ ১২ বজাত নতুন দিল্লীৰ ১৬৪ নং নৰ্থ এভিনিউৰ তেওঁৰ বাসভৱনত (সাংসদ গৃহ) বিজেপিৰ পৰা পদত্যাগৰ বিষয়ে আনুষ্ঠানিকভাৱে সংবাদমেল যোগে জনাব বুলিও সদৰী কৰিছে।