স্বাস্থ্যমন্ত্ৰী অশোক সিংঘলৰ বিৰুদ্ধে বিশেষাধিকাৰ ভংগ প্ৰস্তাৱৰ দাবীত মঙলবাৰে অসম বিধানসভাত এআইইউডিএফ বিধায়কসকলে প্ৰতিবাদ সাব্যস্ত কৰে। অভিযোগ অনুসৰি স্বাস্থ্যমন্ত্ৰীগৰাকীয়ে বাংলাভাষী মুছলমানসকলৰ বিৰুদ্ধে বিতৰ্কিত মন্তব্য প্ৰদান কৰিছিল।
শেহতীয়াকৈ তেওঁৰ সমষ্টি ঢেকীয়াজুলিত সিংঘলৰ মন্তব্যই ‘মিয়া’ বুলি কোৱা বাংলাভাষী মুছলমানসকল চৰকাৰী আঁচনিৰ সুবিধাৰ পৰা বঞ্চিত হ’ব বুলি ইংগিত বহন কৰা বুলি দাবী কৰিছে। এজন মন্ত্ৰীয়ে এটা সম্প্ৰদায়ৰ বিৰুদ্ধে এনেধৰণৰ মন্তব্য কৰাটো চিন্তনীয় বিষয় বুলি বিধায়কগৰাকীয়ে মত প্ৰকাশ কৰিছে। বিধানসভাত প্ৰশ্নৰ বাবে নিৰ্ধাৰিত সময়ৰ শেষত এআইইউডিএফৰ বিধায়ক ৰফিকুল ইছলামে বিশেষাধিকাৰ ভংগৰ প্ৰস্তাৱ আনিবলৈ দাবী জনায়।
বিধায়কগৰাকীয়ে লগতে কয় যে স্বাস্থ্যমন্ত্ৰীগৰাকীয়ে ৰাজহুৱাভাৱে স্পষ্ট কৰি দিছে যে তেওঁ এটা সম্প্ৰদায়ক অপছন্দ কৰে। এআইইউডিএফ বিধায়কসকলে তেওঁক মন্ত্ৰী পদৰ পৰা বৰ্খাস্ত কৰা উচিত আাৰু তেওঁৰ এনে মন্তব্যৰ বাবে ক্ষমা খুজিব লাগিব বুলি দাবী উত্থাপন কৰিছে।
বিধানসভাৰ অধ্যক্ষই বিৰোধীয়ে উত্থাপন কৰা উদ্বেগ স্বীকাৰ কৰে যদিও এই প্ৰস্তাৱে প্ৰয়োজনীয় মাপকাঠী পূৰণ কৰা নাই বুলি বিশেষাধিকাৰ ভংগ প্ৰস্তাৱত অনুমতি দিয়াৰ পৰা বিৰত থাকে।
ইয়াৰ পিছতে এ আই ইউ ডি এফৰ বিধায়কসকলে নিজৰ দাবীক লৈ সৰৱ হৈ পৰাত, সদনত বিশৃংখলতাৰ সৃষ্টি হয়। পৰিস্থিতি উত্তপ্ত হৈ পৰাৰ লগে লগে অধ্যক্ষই ২০ মিনিটৰ বাবে বিধানসভাৰ কাৰ্য্যবিধি স্থগিত ৰাখে।
