স্বপ্নভংগ! ৰাছিয়াই ধ্বংস কৰিলে বিশ্বৰ বৃহত্তম বিমান ইউক্ৰেইনৰ ‘ম্ৰিয়া’

ইউক্ৰেইন যুদ্ধত ৰাছিয়াই ধ্বংস কৰিলে বিশ্বৰ বৃহত্তম বিমান ‘AN-225 Mriya’। দেশখনৰ ৰাজধানী কীয়েভৰ সমীপত প্ৰচণ্ড যুদ্ধ চলি থকাৰ মাজতে ৰাছিয়াৰ সেনা বাহিনীয়ে নিক্ষেপ কৰা মিছাইলত পুৰি ছাৰখাৰ হয় বিমানখন।

ইউক্ৰেইনে নিৰ্মাণ কৰা পণ্যবাহী এই বিমানখন অত্যাধুনিক প্ৰযুক্তিৰে সুসজ্জিত বিশ্বৰ শ্ৰেষ্ঠ নিদৰ্শন হিচাপে পৰিচিত হৈছিল।

ইউক্ৰেইনীয় ভাষাত ‘Mriya’ শব্দৰ অৰ্থ হ’ল স্বপ্ন। বিশালাকাৰৰ এই বিমানখনক লৈ ইউক্ৰেইনে দৰাচলতে এক স্বপ্ন দেখিছিল। ৰাছিয়াৰ আক্ৰমণত ইউক্ৰেইনৰ সেই স্বপ্ন ভংগ হ’ল।

ইউক্ৰইনৰ সংস্থা ‘এন্টোনাভ’য়ে আশীৰ দশকত এই বিমানখন নিৰ্মাণ কৰিছিল।

লগতে পঢ়ক: ৰাছিয়াৰ আক্ৰমণত ৩৫২জন সাধাৰণ নাগৰিকৰ মৃত্যু হোৱা বুলি দাবী কৰিছে ইউক্ৰেইনে

দেশখনৰ বিদেশ মন্ত্রী ডিমিত্র কুলেবাই জনায় যে কীয়েভৰ সমীপৰ এটা বিমানবন্দৰক কেন্দ্ৰ কৰি ৰাছিয়া আৰু ইউক্ৰেইনৰ সেনাৰ মাজত চলা প্ৰচণ্ড সংঘৰ্ষৰ সময়তে ৰাছিয়ান বাহিনীৰ মিছাইল আক্ৰমণত হস্তোমেল বিমানবন্দৰত ৰৈ থকা বিমানখন জ্বলি ছাৰখাৰ হৈ পৰে।     

ডিমিত্ৰই নিজৰ টুইটাৰত লিখিছে, ‘’কীয়েভৰ সমীপৰ এটা বিমানবন্দৰত ৰুছ সেনাৰ আক্ৰমণত ধ্বংস হৈছে বিশ্বৰ বৃহত্তম বিমান ‘ম্ৰিয়া’। কিন্তু আমি বিমানখন পুনৰ নিৰ্মাণ কৰিম। আমি পুনৰ স্বাধীন, শক্তিশালী তথা গণতান্ত্ৰিক ইউক্ৰেইন গঢ়ি তুলিম।‘’  

The biggest plane in the world "Mriya" (The Dream) was destroyed by Russian occupants on an airfield near Kyiv. We will rebuild the plane. We will fulfill our dream of a strong, free, and democratic Ukraine. pic.twitter.com/Gy6DN8E1VR

— Ukraine / Україна (@Ukraine) February 27, 2022

টুইটাৰত বিমানখনৰ ফটোও দিয়া হৈছে। তাত তলত লিখা আছে , ‘’বিশ্বৰ বৃহত্তম বিমানখনক তেওঁলোকে জ্বলাই দিলে। কিন্তু আমাৰ ‘স্বপ্ন’ কেতিয়াও ধ্বংস নহয়।‘’