দেশত ছেপ্তেম্বৰৰ মধ্য ভাগত ক’ৰ’নাৰ সংক্ৰমণৰ গ্ৰাফডাল উৰ্দ্ধমুখী হ’ব।
এই আশংকা ব্যক্ত কৰিছে বিশেষজ্ঞ অধ্যাপক কে শ্ৰীনাথে।
ফাউণ্ডেশ্যন অৱ ইণ্ডিয়া প্ৰেছিডেন্টৰ অধ্যাপক কে শ্ৰীনাথৰ মতে ছেপ্তেম্বৰৰ মধ্য ভাগত দেশত ক’ৰ’নাৰ গ্ৰাফডাল শীৰ্ষত উঠাৰ সম্ভাৱনা আছে।
“এই ব্যাপক হাৰৰ ক’ৰ’না সংক্ৰমণ আমি প্ৰতিৰোধ কৰিব পাৰিব লাগিছিল। পৰিস্থিতি দ্ৰুত নিয়ন্ত্ৰণ কৰিবলৈ আমি চেষ্টা কৰা উচিত আছিল।” শ্ৰীনাথে কয়।
দেশত এই মুহূৰ্তলৈকে প্ৰায় ১০ লাখ ৭৭ হাজাৰ লোক ক’ৰ’নাত আক্ৰান্ত হৈছে। মৃত্যু হৈছে প্ৰায় ২৬ হাজাৰ আক্ৰান্ত।
উল্লেখ্য যে, দেশত ক’ৰ’না আক্ৰান্তৰ সংখ্যা যিমানে বৃদ্ধি পাইছে সেই অনুপাতে অৱশ্যে ক’ৰ’নাৰ পৰা আৰোগ্য হোৱা লোকৰ সংখ্যাও বৃদ্ধি পাইছে।
কিন্তু আক্ৰান্তৰ উৰ্দ্ধমুখী হাৰে চিন্তিত কৰিছে চৰকাৰৰ লগে দেশবাসীক।
ইফালে ক’ৰ’না সংক্ৰমণ প্ৰতিৰোধত সফল হোৱা কেৰেলাত পুনৰ গণ সংক্ৰমণৰ লক্ষণ দেখা দিয়া বুলি মুখ্যমন্ত্ৰী পিনাৰাই বিজয়নে কৰা ঘোষণাই উদ্বেগ বঢ়াই তুলিছে দেশবাসীৰ।
বিজয়নে জনোৱা অনুসৰি ৰাজ্যখনৰ তিৰুঅনন্তপুৰমৰ সমীপৰ কেইবাখনো গাঁৱত ৮৪ টি গণ সংক্ৰমণৰ ঘটনা ঘটিছে। য’ত প্ৰায় ৫০ শতাংশ মানুহ গণ সংক্ৰমণৰ দ্বাৰা সংক্ৰমিত হৈছে।
ইফালে মহাৰাষ্ট্ৰত পূৰ্ব সকলো ৰেকৰ্ড ভংগ কৰি শনিবাৰ দিনটোত ৮,৩৪৮ গৰাকী লোক ক’ৰ’নাত আক্ৰান্ত হৈছে। ৰাজ্যখনত কোভিড১৯ আক্ৰান্ত সংখ্যাই ৩ লাখ অতিক্ৰম কৰিছে।
দেশৰ প্ৰায়বোৰ ৰাজ্যতে প্ৰতিদিনে ক্ৰমাগতভাৱে কোভিড আক্ৰান্তৰ সংখ্যা বৃদ্ধি পাই গৈ আছে।
শনিবাৰে দেশত পূৰ্বৰ সকলো ৰেকৰ্ড ভংগ কৰি প্ৰায় ৩৯ হাজাৰ লোক ক’ৰ’নাত আক্ৰান্ত হৈছে।
এইদৰে দেশত প্ৰতিদিনে আক্ৰান্তৰ সংখ্যা বৃদ্ধি পোৱা দেখা গৈছে। এই গতিত আক্ৰান্তৰ সংখ্যা বৃদ্ধি পাই গৈ থাকিলে আগন্তুক ১০ আগষ্টৰ ভিতৰত দেশত ক’ৰ’নাক্ৰান্তৰ সংখ্যাই ২০ লাখ অতিক্ৰম কৰিব বুলি ধাৰণা কৰা হৈছে। আৰু ছেপ্তেম্বৰৰ মাজ ভাগত দেশত কোভিড আক্ৰান্ত গ্ৰাফডাল শীৰ্ষত অৱস্থান কৰিব!
