ধৰ্মীয় আশ্ৰম খুলি ড্ৰাগছৰ ৰমৰমীয়া বেহা চলাই থকা এজন সাধুৱে তিনি মাহ পলাই থকাৰ পিছত আজি আৰক্ষীৰ ওচৰত আত্মসমৰ্পণ কৰে।
ঘটনাটো ত্ৰিপুৰাৰ ছেপাহী জিলাৰ বিশালগড়ৰ।
মানস দাস নামৰ এই “সাধু”জনে বিশালগড়ৰ শীতলতিলা নামৰ ঠাইখনত থকা নিজৰ ঘৰৰ সন্মুখতে এখন আশ্ৰম খুলিছিল দীৰ্ঘদিনৰ পৰা “অসাধু” ব্যৱসায় চলাই আহিছিল।
তেওঁৰ আশ্ৰমত হিন্দু ধৰ্মৰ বিভিন্নজন দেৱ-দেৱীৰ ফটো ওলমি থাকে যদিও ভিতৰুৱাকৈ পায় ফেন্সিডাইল, য়ুবা টেবলেট, ব্ৰাউন ছুগাৰ, হেৰ’ইন আদি মাৰাত্মক ড্ৰাগছ।
জানিব পৰামতে, ভক্তৰূপী গ্ৰাহকৰ নিয়মীয়াকৈ ভ্ৰমণ ঘটিছিল এই আশ্ৰমলৈ।
যোৱা ৩১ ডিচেম্বৰত আৰক্ষীয়ে হঠাতে আশ্ৰমখনত অভিযান চলায় আৰু ৬জন লোকক গ্ৰেপ্তাৰ কৰে।
আৰক্ষীৰ ভাষ্যমতে, এই লোককেইজন ড্ৰাগছৰ ব্যৱসায়ত জড়িত। অভিযানৰ সময়ত কিছুমান ড্ৰাগছো জব্দ কৰিছিল আৰক্ষীয়ে।
কিন্তু অভিযানটোৰ সময়ত আশ্ৰমৰ মুৰব্বী মানস দাস আৰক্ষীৰ চকুত ধূলি দি পলাবলৈ সক্ষম হৈছিল।
যোৱা প্ৰায় এমাহ ধৰি পলাই থকাৰ পিছত মানস দাসে আজি আদালতত আত্মসমৰ্পণ কৰে।
চৰকাৰী অধিবক্তা জ্যোতিপ্ৰকাশ সাহাই কয়, অভিযুক্তৰ অধিবক্তাই জামিনৰ আৱেদন কৰিছিল যদিও আদালতে সেয়া নামঞ্জুৰ কৰে আৰু তাৰ পৰিৱৰ্তে সাধুজনক ১৪ দিনৰ বাবে কাৰাগাৰলৈ প্ৰেৰণ কৰে।
