নিৰ্বাচনী বতাহে গৰম কৰিছে দিল্লীৰ পৰিস্থিতি! কেজৰিৱালৰ গাড়ীলৈ শিল নিক্ষেপ দুৰ্বৃত্তৰ

নিৰ্বাচনৰ পূৰ্বে ৰাজনৈতিক উত্তেজনা বাঢ়িছে ৰাজধানী দিল্লীত। অহা ৫ ফেব্ৰুৱাৰীত দিল্লীত অনুষ্ঠিত হ’ব বিধানসভা নিৰ্বাচন।

শনিবাৰে বিয়লি দিল্লীৰ বিধানসভা সমষ্টিত প্ৰচাৰৰ বাবে ওলাই আহিছিল দিল্লীৰ প্ৰাক্তন মুখ্যমন্ত্ৰীগৰাকী। কিন্তু হঠাতে তেওঁৰ গাড়ীৰ আশে-পাশে কিছুমান মানুহে প্ৰতিবাদ কৰিবলৈ ধৰিলে। কিছু মুহূৰ্তৰ ভিতৰতে কেজৰিৱালে প্ৰচাৰ চলাই থকা গাড়ীখনত এটা প্ৰকাণ্ড শিলে খুন্দা মাৰে। ইতিমধ্যে এই ঘটনাৰ ভিডিঅ’ ছ’চিয়েল মিডিয়াত ভাইৰেল হৈ পৰিছে।

আপৰ অভিযোগ যে বিজেপি প্ৰাৰ্থী পৰ্বেশ ভাৰ্মাৰ গুণ্ডাবাহিনীয়ে এই কাৰ্য সংঘটিত কৰিছে। কেজৰিৱালৰ ওপৰত শিলগুটি নিক্ষেপ কৰা হৈছে যাতে তেওঁ কোনো ধৰণে প্ৰচাৰ চলাব নোৱাৰে।

ভাইৰেল ভিডিঅ’টোত কেজৰিৱালৰ গাড়ীৰ সন্মুখত কেইবাজনো প্ৰতিবাদকাৰীয়ে ক’লা পতাকা উৰুৱাই থকা দেখা গৈছে। আপৰ অভিযোগ যে গেৰুৱা শিবিৰে আপৰ প্ৰচাৰ বন্ধ কৰাৰ বাবে এনে পৰিকল্পনা কৰিছে।

আৰক্ষীৰ সূত্ৰৰ মতে, কোনে বা কিয় এই আক্ৰমণ সংঘটিত কৰিলে সেয়া এতিয়াও স্পষ্ট হোৱা নাই। অৱশ্যে অভিযোগৰ তদন্ত চলি আছে। ঘটনাৰ লগত বিজেপিৰ কোনো সমৰ্থক জড়িত হ’লে কঠোৰ ব্যৱস্থা গ্ৰহণৰ আশ্বাস দিয়া হৈছে।

শনিবাৰে এখন সংবাদমেলযোগে কেজৰিৱালে নিৰ্বাচনত জয়ী হ’লে দিল্লীত বসবাস কৰা ভাড়াতীয়াসকলক বিনামূলীয়া পানী আৰু বিদ্যুৎ সেৱা প্ৰদান কৰাৰ কথা ঘোষণা কৰে। তাৰ পিছত তেওঁ দলীয় কৰ্মী আৰু সমৰ্থকক লৈ প্ৰচাৰ চলাবলৈ ওলাইছিল। তাতেই সংঘটিত হয় এই আক্ৰমণ। আৰক্ষীয়ে সেই স্থানত উপস্থিত হৈ পৰিস্থিতি নিয়ন্ত্ৰণ কৰে।আনহাতে, প্ৰচাৰৰ সময়ত কেজৰিৱালৰ গাড়ীখনে দুজন বিজেপি সমৰ্থকক খুন্দা মৰা বুলি দাবী কৰিছে বিজেপি প্ৰাৰ্থী পৰ্বেশে। তেওঁলোকৰ ভৰি দুখন ভাঙি গৈছে। গুৰুতৰভাৱে আঘাতপ্ৰাপ্ত হোৱাৰ বাবে চিকিৎসালয়ত ভৰ্তি কৰোৱা হৈছে।