ক’ৰ’নাৰ প্ৰতিৰোধৰ বাবে দেশত হঠাৎ বলৱৎ কৰা ল’কডাউনে দেশৰ কোটি কোটি প্ৰব্ৰজিত শ্ৰমিকৰ জীৱননৈ নমাই আনিছিল চৰম দুৰ্যোগ।
লাখ লাখ শ্ৰমিকে পদব্ৰজে হাজাৰ আৰু শ শ কিলোমিটাৰ পথ অতিক্ৰম কৰি নিজ গৃহাভিমুখে যাত্ৰা কৰিছিল। বহু শ্ৰমিকৰ মৃত্যু ঘটিছিল পদযাত্ৰাৰ সময়ত।
লাখ লাখ শ্ৰমিক অনাহাৰ অনিদ্ৰাত আৱদ্ধ হৈ পৰিছিল প্ৰৱাসত।
চৰকাৰে প্ৰথমাৱস্থাত কোনো পদক্ষেপ লোৱা নাছিল এই প্ৰব্ৰজিত শ্ৰমিকসকলক উদ্ধাৰ বাবে।
তেনে সময়তে প্ৰৱাসী দৰিদ্ৰ শ্ৰমিকৰ ত্ৰাণকৰ্তাৰ ৰূপত আবিৰ্ভাৱ ঘটিছিল বলিউদৰ জনপ্ৰিয় অভিনেতা চুনু চুদ।
অভিনেতা চুনু চুদে একক প্ৰচেষ্টাৰে হাজাৰ হাজাৰ শ্ৰমিকক খাদ্য যোগান ধৰাৰ লগতে নিজ গৃহলৈ প্ৰেৰণ কৰিছিল।
গাড়ী, উৰাজাহাজ ভাড়া কৰি আনকি পিছলৈ ট্ৰেইনৰ টিকট কাটিয়ো হাজাৰ হাজাৰ শ্ৰমিকক নিজ গৃহলৈ প্ৰেৰণ কৰিছিল অভিনেতা চুনু চুদে।
অতি ওচৰৰ পৰা দেখিছিল শ্ৰমিকৰ দুৰ্দশাগ্ৰস্ত দৰিদ্ৰ জীৱন। একাত্ম হৈ পৰিছিল শ্ৰমিকসকলৰ দুখ আৰু দুৰাৱস্থাৰ সৈতে।
এতিয়া চুনুৱে নিজে শ্ৰমিকসকলৰ সৈতে একাত্ম হৈ সঞ্জয় কৰা অভিজ্ঞতালানিক গ্ৰন্থত লিপিৱদ্ধ কৰিবলৈ সিদ্ধান্ত গ্ৰহণ কৰিছে।
“বিগত চাৰে তিনি মাহে মোৰ জীৱন সলনি কৰি দিলে। প্ৰতি দিনে ১৬-১৮ ঘণ্টা প্ৰব্ৰজিত শ্ৰমিকৰ সৈতে জীৱন কটাইছো। তেওঁলোকৰ দুখৰ সমভাগী হৈছে। যেতিয়াই দেখো কোনোৱে তেওঁলোকৰ গৃহাভিমুখে যাত্ৰা কৰিছে, তেতিয়া আমাৰ মন আনন্দৰে ভৰি পৰে। চকুৰ কোণত জিলিকি উঠা সেই চকুপানী আৰু হাঁহি মোৰ জীৱনৰ বৃহত্তম সঞ্চয়। মই তেতিয়াই সংকল্প লওঁ, শেষৰজন প্ৰব্ৰজিত শ্ৰমিকক নিজৰ ঘৰত উপস্থিত নোহোৱা পৰ্যন্ত আমি এই কাম কৰি যাম।” চুনু চুদে কয়।
চুনু চুদৰ মতে এই পৱিত্ৰ কৰ্ম কৰিবলৈকে নিয়তিয়ে তেওঁক মুম্বাইলৈ আনিছিল।
সংবাদ মাধ্যমৰ আগত তেওঁ আৰু কয়, “প্ৰব্ৰজিত শ্ৰমিকসকলৰ হকে মোক কাম কৰাৰ সুযোগ দিয়াৰ বাবে ইশ্বৰক ধন্যবাদ দিছো। আমাৰ হৃদস্পন্দন মুম্বাইত, কিন্তু এই প্ৰব্ৰজিত শ্ৰমিকৰ সূত্ৰে আমাৰ অসম, বিহাৰ, উত্তৰ প্ৰদেশ, ঝাড়খণ্ডৰ গাঁওসমূহৰ সৈতে গভীৰতৰ যোগাযোগ সম্ভৱ হ’ল। এই অভিজ্ঞতাক আমি ধৰি ৰাখিব খুজো।”
উল্লেখ্য যে, এই অভিজ্ঞতাৰ ভিত্তিত লিখিবলগীয়া চুনু চুদৰ গ্ৰন্থখন পেঙ্গুইন ৰেণ্ডম হাউছ ইণ্ডিয়াই প্ৰকাশ কৰিব।
