নিমাতীঘাটত বুধবাৰে সংঘৰ্টিত হোৱা শোকাবহ নাও দুৰ্ঘটনাৰ পিছত নিৰুদ্দিষ্ট যাত্ৰীৰ সন্ধানত আজি কাজিৰঙা ৰাষ্ট্ৰীয় উদ্যান আৰু বোকাখাত আৰক্ষীৰ এটা উদ্ধাৰকাৰী দলে ব্ৰহ্মপুত্ৰ নদীত অভিযান চলায় ৷
কাজিৰঙাৰ অগৰাতলি বনাঞ্চলৰ সমীপৰ ধনশিৰিমুখৰ আৰু ব্ৰহ্মপুত্ৰৰ উত্তৰ পাৰৰ গহপুৰৰ পৰা একেলগে আৰম্ভ এই অভিযানত উদ্ধাৰকাৰী দলে তিনিখনখন যন্ত্ৰচালিত নাৱেৰে নিমাতীঘাটৰ নামনি অঞ্চলত প্ৰায় ৯ ঘন্টা সময় ধৰি ৫০ কিলোমিটাৰৰো অধিক নদীপথত ব্যাপক অভিযান চলায় ৷
বোকাখাতৰ ভাৰপ্ৰাপ্ত আৰক্ষী বিষয়া প্ৰদীপ কুমাৰ বৰা, বিশ্বনাথ সংমণ্ডলৰ বনাঞ্চলিক বিষয়া ইকবাল হোছেইন আৰু পূব অসম বন্যপ্ৰাণী সংমণ্ডলৰ খণ্ড বন বিষয়া তৰুণ গগৈৰ নেতৃত্বত যোৱা আৰক্ষী আৰু বন কৰ্মীৰ ৩৫ জনীয়া দলটোৱে তিনিখন নাৱেৰে ব্ৰহ্মপুত্ৰত উটি অহা সামগ্ৰীৰ সমুহ পৰীক্ষণ কৰে।
তেওঁলোকে লগতে ড্ৰোণ কেমেৰাৰে ব্ৰহ্মপুত্ৰৰ বুকুত নিমাতীঘাটৰ নাও দুৰ্ঘটনাত নিৰুদিষ্ট লোকৰ সন্ধান কৰে ৷
কাজিৰঙাৰ সঞ্চালক পি শিৱকুমাৰ আৰু ডি এফ অ’ ৰমেশ কুমাৰ গগৈয়ে সমগ্ৰ অভিযানৰ তদাৰক কৰে৷
