মমিনুল আৱাল : ৰাম মন্দিৰ নিৰ্মাণাৰ্থে ৫ লাখ টকা আগ বঢ়াব অসমৰ ইছলামধৰ্মী খিলঞ্জীয়া সংগঠনৰ মঞ্চই
ৰাম মন্দিৰ নিৰ্মাণৰ বাবে গঠন হ’ব লগীয়া ট্ৰাষ্টলৈ ৫ লাখ টকা সাহায্য আগ বঢ়োৱাৰ কথা ঘোষণা কৰিছে ইছলামধৰ্মী খিলঞ্জীয়া সংগঠনৰ সমন্বয় মঞ্চ “জনগোষ্ঠীয় সমন্বয় পৰিষদ, অসম”-এ।
অযোধ্যাৰ গোচৰটোৰ ৰায়দান ৰাম মন্দিৰৰ সপক্ষে যোৱাৰ পিছতে নৰ্থ-ইষ্ট নাওৰ আগত আজি এই কথা ঘোষণা কৰে বিজেপি নেতা মুমিনুল আৱালে।
“ৰাম মন্দিৰ নিৰ্মাণৰ ক্ষেত্ৰত উচ্চতম ন্যায়ালয়ে যি ঐতিহাসিক ৰায় প্ৰদান কৰিলে তাক আমি আদৰণি জনাইছো, এই ৰায়ে দীৰ্ঘদিনীয়া বাধা আঁতৰালে আৰু ৰাম মন্দিৰ নিৰ্মাণৰ বাবে আমাৰ তৰফৰ পৰা ৫ লাখ টকা আগ বঢ়াম”, আৱালৰ মন্তব্য।
বাবৰি মছজিদক ‘সাধাৰণ ঘৰৰ’ সৈতে তুলনা কৰি ইয়াত সুদীৰ্ঘ বছৰ ধৰি নামাজ পঢ়া হোৱা নাছিল বুলি আৱালে মন্তব্য কৰে।
ৰায়টোত কিছু সংখ্যক লোকে অসন্তুষ্টি প্ৰকাশ কৰিছে বুলি উল্লেখ কৰি তেওঁ কয়, “তেওঁলোকৰ প্ৰতি এটা অনুৰোধ ধৰ্মীয়ভাৱে এই বিষয়টোত কি আছে, সেই কথা জানিবলৈ ধৰ্মৰ গুৰুসকলৰ সৈতে আলোচনা কৰক।”
ইপিনে, এন আৰ চিৰ প্ৰাক্তন ৰাজ্যিক সমন্বয়ক প্ৰতীক হাজেলাক মধ্য প্ৰদেশলৈ বদলিৰ নিৰ্দেশ দিওঁতে মুখ্য ন্যায়াধীশক ‘চোৰৰ ৰক্ষক’ আখ্যা দিয়া মুমিনুল আৱালে এতিয়া সুৰ সলাই তেওঁৰ প্ৰশংসাত পঞ্চমুখ হৈ পৰে।
“এন আৰ চিৰ সময়ত ৰঞ্জন গগৈক সমালোচনা কৰিছিলো। এন আৰ চিৰ সময়ত তেওঁ আমাক যিমান দুখ দিলে, এজন অসম সন্তান হিচাপে তেওঁ দিয়া এই ৰায়ে তাতকৈ বেছি সুখ দিলে”, আৱালে কয়।