পথ দুৰ্ঘটনাৰ সম্ভাৱনাৰ পৰা হাত সাৰিবলৈ ছত্তীশগড় চৰকাৰে ৰায়পুৰৰ পথত ঘূৰি ফুৰা মালিকবিহীন গৰুৰ শিঙত ৰং কৰাৰ সিদ্ধান্ত লৈছে। বিগত ডেৰ-দুবছৰত ছত্তীশগড়ত সংঘটিত হৈছে ৩০৮টা পথ দুৰ্ঘটনা। বহু ক্ষেত্ৰত দেখা গৈছে, হঠাতে গৰু ৰাস্তালৈ আহে সেই গৰুটোক বচাবলৈ গৈ এটা দুৰ্ঘটনা সংঘটিত হয়। বিশেষকৈ ৰাতি এনে দুৰ্ঘটনা বেছি। এই পৰিস্থিতিত পথ দুৰ্ঘটনাৰ পৰা হাত সাৰিবলৈ ছত্তীশগড় পশুপালন বিভাগে স্বত্বাধিকাৰীবিহীন গৰুৰ শিং ৰং কৰাৰ সিদ্ধান্ত লৈছে। বৰ্তমান এই পদক্ষেপ কেৱল ৰায়পুৰৰ গুৰুত্বপূৰ্ণ পথসমূহৰ আশে-পাশে থকা অঞ্চলসমূহতহে গ্ৰহণ কৰা হৈছে।
২০২২ চনৰ জানুৱাৰী মাহৰ পৰা ছত্তীশগড়ত এই পৰ্যন্ত ৩০৮টা দুৰ্ঘটনাত ২৩১জন লোকৰ মৃত্যু হৈছে। আহত হৈছে কমেও ৬৪জন লোক। চৰকাৰৰ তথ্য মতে, যোৱা ডেৰ-দুবছৰত বাস্তৰত মাওবাদী হিংসাৰ ফলত মৃত্যু হোৱা সাধাৰণ লোকৰ সংখ্যা (১১৫)তকৈ ছত্তীশগড়ত পথ দুৰ্ঘটনাত অধিক লোকৰ মৃত্যু হৈছে। শেহতীয়াকৈ পঞ্চায়ত আৰু গ্ৰামোন্নয়ন বিভাগৰ সম্পাদক নিহাৰিকা বাৰিকে আন বিভাগসমূহক পথ দুৰ্ঘটনা হ্ৰাস কৰাৰ বাবে প্ৰয়োজনীয় পদক্ষেপ গ্ৰহণ কৰিবলৈ অনুৰোধ জনাইছে। ইয়াৰ পিছতে পশুপালন বিভাগৰ পৰা ৰায়পুৰৰ ৰাজপথত মালিকানাধীন গৰুৰ শিং ৰং কৰিবলৈ নিৰ্দেশ জাৰি কৰা হয়।
পশুপালন বিভাগে কয় যে শিঙত ভাল মানৰ উজ্জ্বল ৰং লগাব লাগে। যাতে ৰাতি গাড়ী চলোৱাৰ সময়ত দূৰৰ পৰা সেই ৰংটো দেখি চালকসকলে সজাগ হ’ব পাৰে। ইয়াৰ উপৰিও চহৰৰ বাহিৰৰ পথত যাতে গৰু ওলাই নাহে তাৰ বাবে গাঁওবাসীক সজাগ হ’বলৈ কোৱা হৈছে। পশুপালন বিভাগেও গাঁৱে-ভূঞে সৰু সৰু সভা অনুষ্ঠিত কৰি মানুহৰ মাজত সজাগতা বৃদ্ধি কৰাৰ কথা উল্লেখ কৰিছে।
