ৰাজ্যখনৰ স্বাস্থ্যমন্ত্ৰী কেশৱ মহন্তই আজি এক সংবাদমেলযোগে ৰাজ্যখনৰ কোভিড পৰিস্থিতিৰ লগতে নতুন বছৰত স্বাস্থ্য বিভাগে গ্ৰহণ কৰা পৰিকল্পনাসমূহৰ বিষয়েও সদৰী কৰে।
জনসাধাৰণক ইংৰাজী নৱবৰ্ষৰ শুভেচ্ছা স্বাস্থ্য বিভাগৰ কোভিড যুঁজত অৰিহণা যোগোৱা সাংবাদিক সকলকো ধন্যবাদ জনায় স্বাস্থ্যমন্ত্ৰী কেশৱ মহন্তই।
বিগত বৰ্ষটোৰ কোভিডৰ update দাঙি ধৰি স্বাস্থ্যমন্ত্ৰীগৰাকীয়ে জানিবলৈ দিয়ে যে ৰাজ্যখনত মুঠ আক্ৰান্তৰ সংখ্যা হৈছে ৬২০৮৭৩ জন আৰু ইয়াৰে ৬১২২৮২জনে আৰোগ্য লাভ কৰাৰ বিপৰীতে ৬১৬৪জনে প্ৰাণ হেৰুৱাইছে।
কৰ’নাৰ নতুন ভেৰিয়েন্ট অ’মিক্ৰণৰ বাবে স্বাস্থ্য বভাগে গ্ৰহণ কৰা সতৰ্কতাৰ কথা জানিবলৈ দি স্বাস্থ্যমন্ত্ৰীয়ে কয় যে অসমৰ স্বাস্থ্য বিভাগ অ’মিক্ৰণৰ সৈতে যুঁজিবলৈ সম্পূৰ্ণ প্ৰস্তুত।
স্বাস্থ্যমন্ত্ৰীয়ে কয় যে ১৫-১৮ বছৰ বয়সৰ যুৱক-যুৱতীৰ বাবে স্কুল, কলেজ পৰ্যায়ত ভেকচিন আৰম্ভ হব অহা ৩ জানুৱাৰীৰ পৰা। এসপ্তাহৰ ভিতৰত সকলোকে ভেকচিন প্ৰদান কৰোৱাৰ নিৰ্দেশ দিয়া হৈছে। জিলা উপায়ুক্তসকলৰ জৰিয়তে ভেকচিনেশ্যন ড্ৰাইভ চলিব বুলি তেওঁ জানিবলৈ দিয়ে।
মেট্ৰিক আৰু হায়াৰ ছেকেণ্ডাৰীৰ চূড়ান্ত বৰ্ষৰ পৰীক্ষা offline হব। গতিকে পৰীক্ষাৰ পূৰ্বে সকলোকে ভেকচিন গ্ৰহণৰ আহ্বান জনায় স্বাস্থমন্ত্ৰীয়ে।
স্বাস্থ্যমন্ত্ৰী মহন্তই জানিবলৈ দিয়ে যে ২কোটি ১৭ লাখ লোকক ভেকচিনৰ প্ৰথম ড’জ দিয়া হৈছে আৰু দ্বিতীয় ড’জ লাভ কৰিছে ১কোটি ৫৮লাখ লোকে। সেইদৰে, মুঠ ৩কোটি ৭৫লাখ লোকে কোভিড ভেকচিন লাভ কৰিছে।
স্বাস্থ্যমন্ত্ৰীয়ে জানিবলৈ দিয়া মতে ৰাজ্যত মুঠ ১৬০০ আইচিইউ আছে আৰু ইয়াৰে ১০০০টা আইচিইউ কোভিডৰ বাবে আৰু বাকী ৬০০আইচিইউ সাধাৰণৰ বাবে ৰখা হৈছে।
সেইদৰে, অকক্সিজেন বেড আছে ২৬০০খন আৰু সাধাৰণ বেডৰ সংখ্যা ৯০০০খন। কম দিনৰ ভিতৰতে আন ২৫০০০খন বেড সাজু হ’ব বুলিও তেওঁ জানিবলৈ দিয়ে।
স্বাস্থ্যমন্ত্ৰী মহন্তই লগতে জনায় যে ৰাজ্যত অসমীয়া নৱবৰ্ষৰ সময়ত অসমবাসীয়ে ৮খন নতুন কেন্সাৰ হাস্পাতাল উপহাৰ পাব।
তেওঁ কয় যে নৱবৰ্ষত ৪৬০০খন উপ স্বাস্থ্যকেন্দ্ৰক স্বাস্থ্য ও আৰোগ্য কেন্দ্ৰলৈ ৰূপান্তৰ কৰা হ’ব। ইয়াত ৬খন বেডৰ সুবিধা থাকিব।
স্বাস্থ্যমন্ত্ৰীয়ে জানিবলৈ দিয়ে যে ৰাজ্যত ৬৫৯০০জন লোকে অটল অমৃত যোজনাৰ সুবিধা লাভ কৰিছে। সেইদৰে, ১৯৮১জন শিশুক মিছন স্মাইলৰ সুবিধা প্ৰদান কৰা হৈছে।
তেওঁ লগতে জনায় যে গুৱাহাটীত এখন নতুন মেডিকেল কলেজ হব। কালাপাহাৰত স্থাপন হব এই নতুন মেডিকেল কলেজখন। আনহাতে, MMCH ক super speciality hospital হিচাপে নিৰ্মাণ কৰা হব।
আনহাতে স্বাস্থ্যমন্ত্ৰীয়ে স্বাস্থ্য বিভাগৰ বুষ্টাৰ ড’জ প্ৰদান কৰাৰ পৰিকল্পনাৰ কথাও সদৰী কৰে। ৬০ বছৰৰ বৰ্ষৰ উৰ্ধৰ লোকক প্ৰদান কৰা হব এই বুষ্টাৰ ড’জ। স্বাস্থ্য বিভাগৰ কৰ্মচাৰীসকলক প্ৰথমে প্ৰদান কৰা হব এই বুষ্টাৰ ড’জ।
