ভাৰতীয় চিকিৎসা গৱেষণা পৰিষদে (ICMR) মেডিকেল ইন’ভেচন পেটেণ্ট মিত্ৰ নামৰ এটা নতুন কাৰ্যসূচী আৰম্ভ কৰিছে। ভাৰতত চিকিৎসা উদ্ভাৱন উন্নত কৰাত সহায় কৰাৰ লক্ষ্যৰে এই কাৰ্যসূচী আন্তৰ্জাতিক স্বাস্থ্য প্ৰযুক্তি মূল্যায়ন সিম্পোজিয়াম (ISHTA)ত উন্মোচন কৰা হয়। এই কাৰ্যসূচী NITI আয়োগ, ফাৰ্মাচিউটিকেলছ বিভাগ (DoP), আৰু উদ্যোগ আৰু আভ্যন্তৰীণ বাণিজ্য প্ৰচাৰ বিভাগ (DPIIT)-ৰ সহায়ত বিকশিত কৰা হৈছে।
এই কাৰ্যসূচীৰ মুখ্য উদ্দেশ্য হৈছে নতুন চিকিৎসা প্ৰযুক্তি সৃষ্টি কৰা ব্যক্তিসকলক সহায় প্ৰদান কৰা। ই তেওঁলোকক তেওঁলোকৰ উদ্ভাৱনৰ বাবে পেটেণ্ট প্ৰাপ্তিৰ প্ৰক্ৰিয়াত পথপ্ৰদৰ্শন কৰিব আৰু তেওঁলোকৰ প্ৰযুক্তি উদ্যোগলৈ স্থানান্তৰ কৰাত সহায় কৰিব, যাতে ইয়াক সাধাৰণ জনতাই ব্যৱহাৰ কৰিব পাৰে।
কেন্দ্ৰীয় স্বাস্থ্যমন্ত্ৰী জেপি নাড্ডাই কাৰ্যসূচী উন্মোচন কৰি কয় এই কাৰ্যসূচীয়ে ভাৰতৰ চিকিৎসা উদ্ভাৱনক সমৰ্থন কৰাৰ প্ৰতিশ্ৰুতি প্ৰদান কৰিছে। তেওঁ বিশ্বাস কৰে যে ই ভাৰতীয় বিজ্ঞানী আৰু গৱেষকসকলক তেওঁলোকৰ কাম পেটেণ্টৰ জৰিয়তে সুৰক্ষিত কৰাত আৰু ইয়াক জনসাধাৰণৰ বাবে উপলব্ধ কৰাত সহায় কৰিব।
এই উদ্যোগ আয়ুষ্মান ভাৰতৰ বাবেও গুৰুত্বপূৰ্ণ হ’ব যি উদ্ভাৱনীমূলক চিকিৎসা প্ৰযুক্তি দেশৰ প্ৰতিটো অংশলৈ প্ৰসাৰিত হোৱাটো নিশ্চিত কৰে। ভাৰতৰ স্বাস্থ্য সেৱাত স্বনিৰ্ভৰ হোৱাৰ লক্ষ্যৰ দিশে আগবাঢ়ি গৈছে, আৰু এই কাৰ্যসূচীয়ে দেশীয় চিকিৎসা উদ্ভাৱনক সমৰ্থন কৰি ইয়াক সম্ভৱ কৰি তুলিব বুলি তেওঁ উল্লেখ কৰে।
ICMR-ৰ ডাইৰেক্টৰ জেনেৰেল ৰাজীৱ বাহলে কয় যে এই কাৰ্যসূচীয়ে উদ্ভাৱকসকলক তেওঁলোকৰ ধাৰণাসমূহ পেটেণ্টযোগ্য হয় নে নহয় পৰীক্ষা কৰাৰ পৰা আৰম্ভ কৰি পেটেণ্ট অনুমোদন আৰু ৰক্ষণাবেক্ষণৰ প্ৰক্ৰিয়াত সহায় কৰিব। অনাগত দুটা বছৰত ভাৰতত জীৱ বিজ্ঞানৰ পেটেণ্টৰ সংখ্যা দহগুণ বৃদ্ধি কৰা লক্ষ্যৰে এই কাৰ্যসূচী ৰূপায়ন কৰা হৈছে বুলি উল্লেখ কৰে।
ফাৰ্মাচিউটিকেলছ বিভাগৰ সচিব অমিত আগৰৱালে এই কাৰ্যসূচীটোৰ বিষয়ে উৎসাহ প্ৰকাশ কৰি কয় যে ই উদ্ভাৱক, ষ্টাৰ্ট-আপ, আৰু উদ্যোগসমূহক সহায় কৰিব, আৰু ভাৰতৰ ফাৰ্মাচিউটিকেল আৰু চিকিৎসা প্ৰযুক্তি খণ্ডক খৰচ-চালিতৰ পৰা উদ্ভাৱনমুখী কৰি তুলিব।
উল্লেখ্য যে মেডিকেল ইন‘ভেচন পেটেণ্ট মিত্ৰই ICMR প্ৰতিষ্ঠান, চিকিৎসা মহাবিদ্যালয়, আৰু গৱেষকসকলক সহায় কৰিব। ই পেটেণ্ট মূল্যায়ন, দাখিল কৰা, আৰু উদ্ভাৱনসমূহ উদ্যোগলৈ স্থানান্তৰ কৰাতো সহায় কৰিব। উদ্ভাৱকসকলক উদ্যোগৰ অংশীদাৰসকলৰ সৈতে সংযোগ কৰিবলৈ MedTech “মেলা”ৰ দৰে অনুষ্ঠানো অনুষ্ঠিত কৰা হ’ব।
