অৱশেষত গ্ৰেপ্তাৰ হ’ল বৰপথাৰৰ মৰেল পুলিচিং কাণ্ডৰ মূল অভিযুক্ত। মূল অভিযুক্ত পলাতক ৰাজু শ্ৰেষ্ঠক অৱশেষত গ্ৰেপ্তাৰ কৰে আৰক্ষীয়ে। বৰ্তমানো পলাতক অৱস্থাতত আছে আন দুই অভিযুক্ত। পলাতক ৰণজিৎ শ্ৰেষ্ঠ আৰু শংশাক শ্ৰেষ্ঠ। আনফালে শনিবাৰে গ্ৰেপ্তাৰ কৰিছিল কমল গগৈক নামৰ এজনক।
উল্লেখ্য যে, বৰপথাৰত হৈছিল জঘন্য মৰেল পুলিছিং ঘটনা। এই বৰ্বৰ ঘটনাৰ সৈতে আছু আৰু বিজেপি নেতাৰ লগতে চৰকাৰী চাকৰিয়াল জড়িত থকাৰ অভিযোগ উঠাৰ পাছত ব্যাপক প্ৰতিক্ৰিয়াৰ সৃষ্টি হৈছিল।
গোলাঘাট জিলাৰ বৰপথাৰ থানাৰ অন্তর্গত গেলাবিলত সংঘটিত এই মৰেল পুলিচিঙৰ ঘটনা শেহতীয়াকৈ পোহৰলৈ আহিছিল। ঘটনাটো সংঘটিত হৈছিল বুধবাৰে আবেলি। কিন্তু শেহতীয়াকৈ সামাজিক মাধ্যমত প্ৰচাৰ হোৱা এটি ভিডিঅ’ত দেখা গৈছিল যে দুজন কিশোৰক চুৰিৰ অভিযোগত কেইজনমান লোকে অশ্লীল গালি-গালাজ পাৰি বহুত বেয়াকৈ শাৰীৰিকভাৱে প্ৰহাৰ কৰিছিল। ৰবৰ বাগানৰ পৰা ৰবৰ আৰু ছাগলী চুৰিৰ অভিযোগত এগৰাকী কিশোৰ আৰু এজন যুৱকক বৰ্বৰ শাস্তি বিহা হৈছিল।
স্থানীয় ৰাইজৰ অভিযোগ অনুসৰি ধনশিৰি মহকুমা ছাত্ৰ সন্থাৰ সভাপতি শশাঙ্ক শ্ৰেষ্ঠ আৰু তেওঁৰ জ্যেষ্ঠ ভাতৃ বিজেপি দলৰ বৰপথাৰ মণ্ডলৰ সাধাৰণ সম্পাদক ৰাজু শ্ৰেষ্ঠ আৰু এখন বিদ্যালয়ৰ শাৰীৰিক নিৰ্দেশক ৰণজিৎ শ্ৰেষ্ঠৰ নেতৃত্বত মৰেল পুলিচিঙৰ এই বৰ্বৰ কাণ্ড সংঘটিত হৈছিল।
অতি নিন্দনীয়া কথা যে মাৰপিট কৰিয়েই ক্ষান্ত নাথাকি এই লোককেইজনে সকলো সীমা চেৰাই কিশোৰ আৰু যুৱক দুজনৰ শৰীৰত নিমখ, ভোট জলকীয়া লগাই নিৰ্যাতন চলাইছিল। দুয়োগৰাকী আহত কিশোৰ-যুৱক বৰ্তমান যোৰহাটৰ চিকিৎসালয়ত চিকিৎসাধীন হৈ আছে। এই ঘটনাৰ বিষয়ে ৰাজহুৱা হোৱাত বিভিন্ন মহলত সৃষ্টি হোৱা প্ৰতিক্ৰিয়াৰ পিছত বৰপথাৰৰ গেলাবিলৰ মৰেল পুলিচৰ ঘটনাৰ লগত নাম সাঙোৰ খাই পৰা ধনশিৰি মহকুমা ছাত্ৰ সন্থাৰ সভাপতি শশাঙ্ক শ্ৰেষ্ঠক ছাত্র সন্থাৰ সকলো বিষয় বাবৰ পৰা অব্যাহত দিছিল গোলাঘাট জিলা ছাত্ৰ সন্থাই। আনফালে ৰাজু শ্ৰেষ্ঠক বিজেপিৰ দায়িত্বৰ পৰা অব্যাহতি দিয়া হৈছিল।
