মোদীৰ চৰকাৰে সলনি কৰিব নতুন দিল্লীৰ ঐতিহাসিক ৰাজপথৰ নাম। এই বিষয়ত যাৱতীয় প্ৰস্তাৱ ইতিমধ্যে গ্ৰহণ কৰা হৈছে। নতুন দিল্লী পৌৰ নিগমে শেহতীয়াকৈ ঐতিহাসিক “ৰাজপথ”ক “কৰ্তব্য পথ” হিচাপে পুনৰ নামকৰণ কৰাৰ প্ৰস্তাৱ গৃহীত কৰে।
ঐতিহাসিক ৰাজপথ ৰাষ্ট্ৰপতি ভৱনৰ পৰা ৰাইচিনা হিলৰ হৈ বিজয় চক আৰু ইণ্ডিয়া গেট, ৰাষ্ট্ৰীয় যুদ্ধ স্মাৰকৰ পৰা দিল্লীৰ ৰাষ্ট্ৰীয় ষ্টেডিয়ামলৈ গৈছে। ঐতিহাসিক ৰাজপথতেই প্ৰতিবছৰে ২৬ জানুৱাৰীত গণৰাজ্য দিৱসৰ পেৰেড অনুষ্ঠিত কৰা হৈ আহিছে।
১৯১১ চনত ব্ৰিটিছ চৰকাৰে ৰাজধানী তেতিয়াৰ কলিকতাৰ পৰা দিল্লীলৈ স্থানান্তৰ কৰাৰ সিদ্ধান্ত লোৱাৰ পিছতে ৰাজপথ নিৰ্মাণ কৰা হৈছিল। ব্ৰিটিছ চৰকাৰে নতুন ৰাজধানী চহৰখন নিৰ্মাণ কৰিবলৈ চাৰ এডউইন লুটিয়েনক দায়িত্ব দিছিল।লুটিয়েনে ভাইচৰেগাল প্ৰাসাদৰ পৰা দিল্লী চহৰৰ মাজৰে নিৰ্মাণ কৰোৱাইছিল ৰাজপথ।
পথটোৰ আন এগৰাকী ডিজাইনাৰ আছিল ছাৰ হাৰ্বাৰ্ট বেকাৰ। পথটো সম্ৰাট পঞ্চম জৰ্জৰ সন্মানত পথটোৰ নাম কিংছ ৱে বা কিংছৱে ৰখা হৈছিল। স্বাধীনতাৰ পিছত পথটোৰ নাম কিংছৱেৰ অনুবাদ কৰি ৰাজপথ ৰখা হৈছিল। লোকসভাৰ সাংসদ তথা এন ডি এম চিৰ সদস্য মীনাক্ষী লেখিয়ে এই কথা প্ৰকাশ কৰিছে।
লেখীয়ে কয় ” আমি আজি বিশেষ পৰিষদৰ বৈঠকত ৰাজপথৰ নাম কৰ্তব্য পথ হিচাপে নামাকৰণ কৰাৰ প্ৰস্তাৱত অনুমোদন জনাইছো,” । কেন্দ্ৰীয় বৈদেশিক পৰিক্ৰমা আৰু সাংস্কৃতিক দপ্তৰৰ ৰাজ্যিক মন্ত্ৰীগৰাকীয়ে তেওঁৰ অফিচিয়েল টুইটাৰ একাউণ্টত কৈছে যে ৰাজপথক “কৰ্তব্য পথ”লৈ পুনৰ নামকৰণ কৰাটো সৰ্বসন্মত সিদ্ধান্ত।। তেওঁ কয় যে আমি স্বাধীনতাৰ ৭৫ বছৰ সম্পূৰ্ণ কৰাৰ লগে লগে, ঔপনিৱেশিক ধাৰণাবোৰ এৰাই চলিবৰ হ’ল।
