দ্বাদশ উত্তৰ কাছাৰ পাৰ্বত্য স্বায়ত্ত শাসিত পৰিষদৰ নৱ নিৰ্বাচিত সদস্য সকলক সোমবাৰে ঈশ্বৰৰ নামত শপত বাক্য পাঠ কৰোৱা হয়। হাফলং কালচাৰেল ইনষ্টিটিউট হলত ৰাজ্যপালৰ হৈ শপত বাক্য পাঠ কৰায় ডিমা হাচাও জিলাৰ ভাৰপ্ৰাপ্ত উপায়ুক্ত ভাস্কৰ দেৱশৰ্মাই।
শপত গ্ৰহণ অনুষ্ঠানৰ প্ৰথমতে শপত লয় ১ নং হাফলং আসনৰ কংগ্ৰেছ দলৰ নিৰ্বাচিত প্ৰতিনিধি ড্যানিয়াল লাংথাচাই। লাংথাচাই ইংৰাজী ভাষাত শপত বাক্য পাঠ কৰে। জাতিঙ্গা আসনৰ নিৰ্দলীয় প্ৰাৰ্থী ফ্লেমিঙ ৰূপছিয়েও ইংৰাজীত শপত লয়। ইপিনে,বৰাইল আসনৰ গুলৰিনলাল চাঙছানে কুকি ভাষাত শপত লয়। মাৰ ভাষাত শপত লয় জিনাম আসনৰ বিজেপি প্ৰতিনিধি জছিনথাঙ মাৰ আৰু ল’ৱাৰ খাৰথং আসনৰ বিজেপি প্ৰতিনিধি নাম্ৰোথাঙ মাৰে।
আনহাতে, ডিমাচা ভাষাত শপত বাক্য পাঠ কৰে দেহাংগী আসনৰ নিৰ্বাচিত বিজেপি প্ৰাৰ্থী দেবলাল গাৰ্লচা, হামৰি আসনৰ মনজিত নাইডিঙ, গুনজুঙৰ নজিত কেম্প্ৰাই, হাতিখালী আসনৰ নিৰ্দলীয় প্ৰাৰ্থী বিমল হোজাই, ডাওটোহাজা আসনৰ বিজেপি প্ৰাৰ্থী নিপোলাল হোজাই, হাদিঙমা আসনৰ দেবজিত বাঠাৰি,মাইবাঙ পূৰ্ব আসনৰ নন্দিতা গাৰ্লচা, মাইবাঙ পশ্চিম আসনৰ নিৰ্দলীয় প্ৰাৰ্থী বিজিত লাংথাচা, কালাচান্দৰ বিজেপি প্ৰাৰ্থী ৰতন জাৰাম্বুছা, হাজাদিচাৰ প্ৰজিত হোজাই, ওৱাজ’ৰ বিশ্বজিত দাউলাগুপু, লাঙটিংৰ গলঞ্জ থাউচেন,দিয়ুঙব্ৰাৰ নবজিত হোজাই, হাৰাংগাজাওৰ অমেন্দু হোজাই আৰু চেমখৰৰ ৰাণু লাংথাচাই।
উক্ত ডিমাচা ভাষাত শপত বাক্য পাঠ কৰা সদস্যকেইজনে লগতে ডিমাচা পৰম্পৰাগত পোচাক পৰিধান কৰে। তদুপৰি, দিগেৰ, মাহুৰ আৰু হাংগ্ৰুমৰ প্ৰতিনিধিত্ৰয় ক্ৰমে বিজেপিৰ চ্যামুয়াল চাঙছান,ৰাহুল নাইডিঙ আৰু নিৰ্দলীয় নোৱা দাইমে ইংৰাজীত শপত বাক্য পাঠ কৰে।
সেইদৰে, লাইচঙৰ বিজেপি প্ৰতিনিধি পাওদামিঙ নৃয়ামে জেমি ভাষাত আৰু দলং আসনৰ নিৰ্দলীয় প্ৰাৰ্থী এছ টি জেম ৰাঙখলে ৰাঙ্খল ভাষাত শপত বাক্য পাঠ কৰে। কিন্তু ব্যতিক্ৰম আছিল দিহামলাই আসনৰ নিৰ্দলীয় প্ৰতিনিধি ৰামগালুঙবে জেমি। জেমিয়ে ৰাষ্ট্ৰ ভাষা হিন্দীত শপত বাক্য পাঠ কৰে।
শপত গ্ৰহণ অনুষ্ঠানৰ পাছত প্ৰাক্তন মুখ্য কাৰ্যবাহী দেবলাল গাৰ্লচায় সংবাদ মাধ্যমৰ আগত কয় যে সংসদীয় সমিতিৰ বৈঠকত অধ্যক্ষ কোন হ’ব এই বিষয়ে সিদ্ধান্ত লোৱা হ’ব আৰু মঙলবাৰে উপৰোক্ত পদৰ কাৰণে দলৰ ফালৰ পৰা মনোনয়ন দাখিল কৰা হ’ব। তদুপৰি, ৰাজ্যপালৰ পৰা অনুমোদন লাভ কৰাৰ পাছত মুখ্য কাৰ্যবাহী পদৰ নিৰ্বাচন অনুষ্ঠিত হ’ব।
