গোটেই বিশ্বকে অস্থিৰ কৰি ৰখা নভেল কৰ’না ভাইৰাছ এতিয়া এক আতংকৰ নাম। চীনত আৰম্ভ হোৱা কৰ’না ভাইৰাছৰ সংক্ৰমণে এতিয়া বিশ্বৰ প্ৰান্তে প্ৰান্তে জনসাধাৰণৰ জীৱন যাত্ৰা স্থৱিৰ কৰি তুলিছে।
এনে সময়তে ভাৰতৰ এটা দ্বীপপুঞ্জই কোভিড মুক্ত হৈ ৰৈছে আৰু এই ভাইৰাছৰ সংক্ৰমণৰ বিৰুদ্ধে ই এক দৃষ্টান্ত দাঙি ধৰিছে।
মুঠ ৩৬টা দ্বীপক লৈ গঠিত আৰৱ সাগৰৰ এই দ্বীপপুঞ্জ লাক্ষাদ্বীপত এতিয়ালৈকে এটাও কোভিড-১৯ পজিটিভ ধৰা পৰা নাই।
কেন্দ্ৰীয় স্বাস্থ্য মন্ত্ৰ্যালয়ৰ কোভিড বুলেটিনৰ তালিকাত এতিয়ালৈকে এই অঞ্চলটোৰ নাম অহা নাই কিয়নো ইয়াত কোনো লোক কৰ’নাত আক্ৰান্ত হোৱা নাই।
ইপিনে, লাক্ষাদ্বীপৰ প্ৰশাসনে আনকি তাত স্কুল খোলাৰ বাবেও কেন্দ্ৰীয় চৰকাৰৰ পৰা অনুমতি বিচাৰিছে।
লাক্ষাদ্বীপৰ মুঠ ৭০হাজাৰ জনসংখ্যাৰ ৯৭শতাংশই হৈছে মুছলমান। ইয়াৰ একমাত্ৰ সাংসদ মহম্মদ ফইজলে জানিবলৈ দিয়ে যে বহিৰাগতৰ প্ৰৱেশ নিষিদ্ধ কৰাৰ ফলতেই দ্বীপপুঞ্জটোৱে এনে সফলতা লাভ কৰিবলৈ সক্ষম হৈছে।
তেওঁ জানিবলৈ দিয়ে যে জানুৱাৰিৰ অন্তিমভাগত যেতিয়া কেৰালাত প্ৰথম কোভিড আক্ৰান্ত ধৰা পৰে তেতিয়াই ইয়াত সতৰ্কতা অৱলম্বন কৰি বিদেশী পৰ্যটকৰ প্ৰৱেশ বন্ধ কৰি দিয়া হয়।
সেয়াই নহয়, এন্ট্ৰি পাৰ্মিট লৈ যিসকল লোকে বাহিৰৰ পৰা ইয়াত কাম কৰিবলৈ আহে তেওঁলোকৰ বাবেও লাক্ষাদ্বীপত প্ৰৱেশ বন্ধ কৰি দিয়া হয়।
আনহাতে, ইয়াত আৰক্ষীয়ে কঠোৰভাৱে কাৰ্ফিউ বলবৎ কৰে আৰু কোনো লোক অযথা ঘৰৰ বাহিৰলৈ ওলোৱা নাই।
যিসকলে জৰুৰী চিকিৎসা সেৱা বা আন বিশেষ প্ৰয়োজনত দ্বীপপুঞ্জৰ বাহিৰলৈ যাবলগীয়া হৈছে তেওঁলোকৰ বাবে কোচিত দুটা কোৱাৰেন্টাইন চেন্টাৰ আৰম্ভ কৰা হৈছে। তাত সাত দিন থকাৰ পাছত পৰীক্ষাত নিগেটিভ আহিলেহে তেওঁলোকক ঘুৰি অহাৰ অনুমতি দিয়া হৈছে।
