প্ৰকৃতি আৰু পৰিৱেশৰ ধ্বংসলীলা চলাইছে হিমন্ত বিশ্ব শৰ্মা নেতৃত্বাধীন চৰকাৰে। উচ্চ ন্যায়ালয়ৰ নিৰ্দেশক বৃদ্ধাংগুষ্ঠ দেখুৱাই শুকুৰবাৰে মাজনিশা অন্ধকাৰত চোৰৰ দৰে দীঘলীপুখুৰী আৰু আমবাৰীৰ সমীপত থকা কেইবাজোপাও গছ কাটি পেলালে প্ৰশাসনে। নুনমাটি আৰু ৰিজাৰ্ভ বেংক সংযোগী নিৰ্মিয়মান ফ্লাই অভাৰ নিৰ্মাণৰ বাবেই এই গছসমূহ কটা হৈছে।
ইপিনে গছ কটাৰ কথা জানিব পাৰি বাধা দিবলৈ যোৱা বিভিন্ন দল-সংগঠনৰ প্ৰতিনিধি আৰু ছাত্ৰ-ছাত্ৰীক আটক কৰি লৈ যায় লতাশিল আৰক্ষীয়ে। এইদৰে মুঠ ৯ গৰাকী লোকক আৰক্ষীয়ে আটক কৰে।
চৰকাৰে গছকটা কাৰ্যক বাধা দিবলৈ যোৱা নিৰংকুশ নাথ, উৎপলা দাস, ৰাজদ্বীপ মহন্ত, দেৱব্ৰত শইকীয়া, নৌচাদ ৰাছিদ, আলোক নৰহ, অনিন্দিতা দাস, অংকুমান বৰদলৈ, দ্বীপশ্বেখৰ কলিতাক ধৰি লৈ যায় আৰক্ষীয়ে। তেওঁলোকক ওৰে নিশা লতাশিল আৰু পাণবজাৰ মহিলা থানাত আটক কৰি ৰাখি পুৱা ৬ বজাত মুকলি কৰি দিয়া হয়।
উল্লেখ্য যে পূৰ্বে গুৱাহাটী উচ্চ ন্যায়ালয়ে এটা জনস্বাৰ্থ জড়িত গোচৰত এই গছসমূহ নাকাটিবলৈ ৰাজ্য চৰকাৰক নিৰ্দেশ দিছিল গুৱাহাটী উচ্চ ন্যায়ালয়ে। ন্যায়ালয়ৰ নিৰ্দেশৰ পিছত ফ্লাই অভাৰ নিৰ্মাণৰ বাবে গছ কটা নহয় বুলিও ন্যায়ালয়ত শপতনামা দাখিল কৰিছিল অসম চৰকাৰে। গছ কটাৰ পৰিৱৰ্তে বিকল্প পদ্ধতিৰে ফ্লাই অভাৰৰ নিৰ্মাণৰ কাম কৰা হ’ব বুলি শপতনামাত উল্লেখ কৰা হৈছিল। কিন্তু পৰৱৰ্তী সময়ত ট্ৰান্সলোকেটৰ নামত কেইবাজোপাও গছ কাটি পেলায় প্ৰশাসনে।
স্থানীয় ৰাইজ আৰু প্ৰকৃতিপ্ৰেমী সকলে দাবী কৰে যে ট্ৰান্সলোকেটৰ বাবে অবৈজ্ঞানি পদ্ধতিৰে গছ সমূহ উঠাই নিয়া হৈছে। ডালপাত সকলো কাটি কেৱল গা গাছডাল নি অন্য ঠাইত ৰোপন কৰিলে গছসমূহ বাচি নাথাকে বুলি দাবী কৰিছে প্ৰকৃতিপ্ৰেমীসকলে।
