আপৰ সৈতে সংঘাতৰ মাজতে ৰাঘৱ চাদ্ধাৰ ‘জেড প্লাছ’ নিৰাপত্তা প্ৰত্যাহাৰ পঞ্জাৱ চৰকাৰৰ

আম আদমী পাৰ্টিৰ সৈতে ৰাঘৱ চাদ্ধাৰ সংঘাত ক্ৰমাৎ বৃদ্ধি পাবলৈ ধৰিছে। শেহতীয়াকৈ পঞ্জাৱৰ আপ চৰকাৰে ৰাঘৱ চাদ্ধাৰ জেড প্লাছ নিৰাপত্তা ব্যৱস্থা প্ৰত্যাহাৰ কৰিছে। ইয়াৰ মাত্ৰ কিছু সময়ৰ পূৰ্বে দলটোৱে তেওঁক ৰাজ্যসভাৰ উপ-নেতাৰ পদৰ পৰাও অপসাৰণ কৰিছিল।

৩৭ বছৰীয়া ৰাঘৱৰ নিৰাপত্তাত নিয়োজিত হৈ থকা পঞ্জাৱ আৰক্ষীৰ বিষয়া আৰু কৰ্মীসকলক তৎকালীনভাৱে নিজৰ মুখ্য কাৰ্যালয়লৈ উভতি যাবলৈ নিৰ্দেশ দিয়া হৈছে। এই ঘটনাবোৰৰ পাছতে ৰাজনৈতিক মহলত তীব্ৰ চাঞ্চল্যৰ সৃষ্টি হৈছে আৰু তেওঁ অৰবিন্দ কেজৰিৱালৰ দল এৰি নতুন দল গঠন কৰাৰ সম্ভাৱনা প্ৰকট হৈ পৰিছে।

ৰাজ্যসভাৰ উপ-নেতাৰ পদৰ পৰা অপসাৰণ কৰাৰ পাছতে ৰাঘৱ চাদ্ধাই ছচিয়েল মিডিয়া প্লেটফৰ্ম এক্সত এটা ভিডিঅ আপলোড কৰি নিজৰ মৌনতা ভংগ কৰে। এই ভিডিঅটোত তেওঁ ৰাজ্যসভাত কটোৱা বিভিন্ন গুৰুত্বপূৰ্ণ মুহূৰ্তসমূহ তুলি ধৰিছে। সংসদত জনসাধাৰণৰ সমস্যাসমূহ দৃঢ়তাৰে উত্থাপন কৰাৰ বাবে তেওঁ ছচিয়েল মিডিয়াত যথেষ্ট জনপ্ৰিয়। এই ভিডিঅটোত তেওঁক মোবাইল ৰিচাৰ্জৰ ম্যাদ ৩০ দিনৰ পৰিৱৰ্তে কিয় ২৮ দিন হয় বুলি প্ৰশ্ন কৰা, গিগ কৰ্মীসকলৰ অধিকাৰৰ বাবে মাত মাতি অহা আৰু পিতৃত্বৰ ছুটীৰ দৰে বিষয়বোৰৰ সপক্ষে থিয় দিয়া দেখা গৈছে।

এতিয়া এই কথা প্ৰায় স্পষ্ট হৈ পৰিছে যে তেওঁ আৰু আম আদমী পাৰ্টিৰ লগত নাথাকে। তেওঁ বিজেপিত যোগদান কৰিব নেকি তাক লৈয়ো চৰ্চা চলিছে। ইয়াৰ মাজতে এজন সমৰ্থকে ছচিয়েল মিডিয়াত পৰামৰ্শ দিছিল যে ৰাঘৱে বৰ্তমানৰ আন কোনো দলত যোগদান কৰাতকৈ নিজাকৈ এটা নতুন ৰাজনৈতিক দল গঠন কৰা উচিত, যাৰ নাম সম্ভৱতঃ জেন জেড পাৰ্টি হ’ব পাৰে। সমৰ্থকজনে যুক্তি দিছিল যে আন দললৈ গ’লে তেওঁ সমালোচনাৰ সন্মুখীন হ’ব পাৰে আৰু জনপ্ৰিয়তা হ্ৰাস পাব পাৰে। এই পোষ্টটোৰ উত্তৰত ৰাঘৱে আকৰ্ষণীয় চিন্তা বুলি এটা চমু মন্তব্য কৰাৰ পাছতে নতুন দল গঠনৰ জল্পনা-কল্পনা বৃদ্ধি পাইছে।

আনহাতে, আম আদমী পাৰ্টিয়ে দাবী কৰিছে যে ৰাঘৱে বিগত দুবছৰ ধৰি বিজেপিৰ সৈতে যোগাযোগ ৰাখিছে আৰু ইতিমধ্যে দলটোৰ সৈতে তেওঁৰ আলোচনা চূড়ান্ত হৈছে।