দুবছৰ পূৰ্বে পৰ্বতঝোৰাৰ ২নং জংগীৰকিল্লাত নিৰ্মাণ কৰা জল জীৱন মিছনৰ অধীনত খোৱাপানীৰ প্ৰকল্পই স্থানীয় ৰাইজক কোনো ধৰণৰ বিশুদ্ধ পানী যোগান ধৰাত ব্যৰ্থ হৈছে। প্ৰতিটো ঘৰলৈ পাইপেৰে পানী অনাৰ বাবে আৰম্ভ কৰা এই আঁচনিখন এতিয়া অচলাৱস্থাত পৰি আছে।
মন্ত্ৰী জয়ন্ত মল্ল বৰুৱাৰ নেতৃত্বত বিভাগটোৰ অধীনলৈ অহা এই প্ৰকল্পটো সম্পূৰ্ণ হোৱাৰ কিছুদিন পিছত পানী যোগান আৰম্ভ হৈছিল যদিও কিছুদিন পিছতে বিভিন্ন ঠাইত পাইপলাইন ফাটিবলৈ ধৰে পানী যোগান বন্ধ হৈ পৰে। তেতিয়াৰ পৰা আঁচনিৰ পৰা এটোপাল পানীও যোগান ধৰা হোৱা নাই।
স্থানীয় লোকে এই বিফলতাৰ বাবে দুৰ্বল নিৰ্মাণ আৰু নিম্নমানৰ সামগ্ৰীৰ ব্যৱহাৰক দোষাৰোপ কৰে। নিৰ্মাণৰ সময়ত স্থানীয় লোকে অভিযোগ উত্থাপন কৰিছিল যদিও এই অভিযোগ আওকাণ কৰা হৈছিল। ইয়াৰ ফলত ৰাইজৰ মাজত যথেষ্ট হতাশাৰ সৃষ্টি হৈছে। ইমান বৃহৎ পৰিমাণৰ ৰাজহুৱা ধন খৰচ নষ্ট হোৱাত ক্ষুব্ধ হৈ পৰিছে স্থানীয় লোক। প্ৰকল্পটো মেৰামতি কৰি পানী যোগান পুনৰ আৰম্ভ কৰাৰ বাবে চৰকাৰক জৰুৰী পদক্ষেপ ল’বলৈ দাবী জনাইছে অঞ্চলটোৰ ৰাইজে।
