যিসময়ত ৰাজ্যৰ নৈ-উপনৈসমূহৰ বাঢ়নী পানীয়ে বিভীষিকাময় পৰিস্থিতিৰ সৃষ্টি কৰিছে তেনে সময়ত ব্ৰহ্মপুত্ৰৰ খৰাং বুকুয়ে শংকিত কৰিছে নৈপৰীয়া ৰাইজক।
বাৰিষা সময়ত যি ব্ৰহ্মপুত্ৰ নদীৰ বুকু পানীয়ে উপচি থাকিব লাগিছিল, সেই সময়ত টীয়কৰ জাঁজী মুখৰ ব্ৰহ্মপুত্ৰ নদীৰ দৃশ্যই সকলোকে আচৰিত কৰি তুলিছে।
চকুৰে দেখা পোৱালৈকে মাথোঁ বালিচৰ। ব্ৰহ্মপুত্ৰৰ কাষৰীয়া লোকসকল আজি শংকিত হৈ পৰিছে ব্ৰহ্মপুত্ৰৰ এই অস্বাভাৱিক ৰূপ দেখি ।
এই বছৰৰ এই অস্বাভাৱিক পৰিৱৰ্তনৰ বাবে নৈপৰীয়া ৰাইজ চিন্তিত হৈ পৰিছে। ইয়াৰ পৰা পৰিত্ৰাণ পাবৰ বাবে অস্বাভাৱিক এই পৰিস্থিতিৰ পৰ্য্যবেক্ষণ কৰি সোনকালে এক ব্যৱস্থা গ্ৰহণ কৰিবলৈ চৰকাৰলৈ আহ্বান জনাইছে ৰাইজে। অন্যথা অনাগত দিনত এক ভয়াবহ পৰিস্থিতিৰ সন্মুখীন হ’ব লাগিব মানৱ সমাজ।
অসমীয়াৰ আয়ুসৰেখা সদৃশ মহাবাহু ব্ৰহ্মপুত্ৰ নদীৰ এনে অস্বাভাৱিক পৰিৱৰ্তনৰ কাৰণ যিয়ে নহওঁক কিয়, ই যে মানৱ সভ্যতাৰ বাবে এক অশনি সংকেত কঢ়িয়াই আনিছে সেয়া নিশ্চিত।
