আজি অসমীয়া সামাজিক জীৱনৰ পৰম আৰাধ্য শ্ৰীমন্ত শংকৰদেৱৰ মহাপ্ৰয়াণৰ তিথি। ১৫৬৮ চনত আজিৰ দিনটোতে বৰ্তমান পশ্চিম বংগৰ অন্তৰ্গত কোচ বিহাৰত ভেলাডোংগাত মহাপুৰুষজনাৰ মহাপ্ৰয়াণ ঘটিছিল বুলি ধৰা হয়।
এই তিৰোভাৱৰ দিনটোক অসমৰ বৈষ্ণৱসকলে ভক্তিসহ পালন কৰি আহিছে। আজিৰ তিথি উপলক্ষে সমগ্ৰ ৰাজ্যৰ বিভিন্ন ঠাইৰ নামঘৰে নামঘৰে আজি হৰিনামৰ ধ্বনি আৰম্ভ হৈছে। বিভিন্ন ঠাইত মহাপুৰুষীয়া ধৰ্মীয় সমাজৰ লোকসকলে নাম-প্ৰংসগেৰে ভক্তিৰ ৰস নিগৰাবলৈ আৰম্ভ কৰিছে।
আনহাতে ৰাজ্য চৰকাৰে আজি, অৰ্থাৎ ১১ ছেপ্তেম্বৰৰ দিনটো শ্ৰীমন্ত শংকৰদেৱৰ তিৰোভাৱ তিথি উপলক্ষে এন আই এক্টৰ ২৫ অনুচ্ছেদৰ অধীনত বন্ধ ঘোষণা কৰিছে। ফলত আজি অসমৰ সকলো বিত্তীয় প্ৰতিষ্ঠান, সমবায় বেংক আদি বন্ধ থাকিব।
উল্লেখযোগ্য যে ৰাজ্য চৰকাৰে চৰকাৰী বন্ধৰ তালিকাত আজিৰ দিনটোক, অৰ্থাৎ মহাপুৰুষজনাৰ মহাপ্ৰয়াণ তিথিটোক বন্ধৰ দিন হিচাপে ঘোষণা কৰিছিল যদিও ইয়াক এন আই এক্টৰ অধীনত কৰা নাছিল। ফলত বিত্তীয় প্ৰতিষ্ঠানবোৰ এই বন্ধৰ আওতাত পৰা নাছিল। কিন্তু ইয়াৰ বিৰুদ্ধে অগপ দলে এক বৰ্ধিত কাৰ্যনিৰ্বাহকত প্ৰস্তাৱ গ্ৰহণ কৰি ৰাজ্য চৰকাৰলৈ পত্ৰ প্ৰেৰণ কৰিছিল।
দলটোৱে উল্লেখ কৰে যে শ্ৰীমন্ত শংকৰদেৱৰ তিথিত চৰকাৰে এন আই এক্টৰ অধীনত বন্ধ ঘোষণা কৰিব লাগে। দলটোৰ এই দাবীৰ প্ৰতি সঁহাৰি জনাই অৱশেষত চৰকাৰৰ সাধাৰণ প্ৰশাসন বিভাগে এক নিৰ্দেশযোগে আজিৰ দিনটোক বন্ধৰ দিন হিচাপে ঘোষণা কৰে।
