এনআৰচি প্ৰসংগ : ৰহিঙীয়া শৰণাৰ্থীৰ দৰে অৱস্থা হোৱাৰ আশংকা সীতাৰাম য়েচুৰীৰ
নতুন দিল্লীত শুকুৰবাৰে এক প্ৰতিবাদী কাৰ্যসূচীত অংশগ্ৰহণ কৰি জ্যেষ্ঠ বাওঁপন্থী নেতা সীতাৰাম য়েচুৰীয়ে কয় যে ৰাষ্ট্ৰীয় নাগৰিকপঞ্জীৰ পৰা বাদ পৰিবলগীয়া লাখ লাখ লোকৰ ভৱিষ্যৎ ৰহিঙীয়া শৰণাৰ্থীৰ দৰে হোৱাৰ আশংকা আছে।
তেওঁ লগতে কয় যে বিজেপিৰ ৰাষ্ট্ৰীয় সভাপতি অমিত শ্বাহে দাবী কৰা ধৰণে নাগৰিকপঞ্জীৰ খচৰাৰ পৰা বাদ যোৱা ৪০ লাখ লোকৰ সকলোৱেই অনুপ্ৰৱেশকাৰী কেতিয়াও হ’ব নোৱাৰে।
আনহাতে, খচৰাত বহুসংখ্যক খিলঞ্জীয়া লোকৰ নামো অন্তৰ্ভুক্ত হোৱা নাই বুলি উল্লেখ কৰি য়েচুৰীয়ে নাগৰিকপঞ্জীৰ পূৰ্ণাংগ খচৰাৰ পৰা বাদ যোৱা লোকসকলৰ ভৱিষ্যতক লৈ কেন্দ্ৰীয় চৰকাৰে এতিয়াৰে পৰা চিন্তা-চৰ্চা কৰা উচিত বুলি ব্যক্ত কৰে। এইক্ষেত্ৰত বাংলাদেশৰ সৈতে কূটনৈতিক পৰ্যায়ত পদক্ষেপ লোৱাৰো দাবী উত্থাপন কৰে বাওঁপন্থী নেতাজনে।
উল্লেখযোগ্য যে এখন শুদ্ধ নাগৰিকপঞ্জী প্ৰস্তুত কৰা আৰু হিন্দু বাংলাদেশীক নাগৰিকত্ব প্ৰদানৰ দিহা থকা নাগৰিকত্ব সংশোধনী বিধেয়কখনৰ বিৰোধিতাৰে শুকুৰবাৰে নতুন দিল্লীৰ যন্তৰ মন্তৰত বাওঁ গণতান্ত্ৰিক মঞ্চ, অসমৰ উদ্যোগত আয়োজিত প্ৰতিবাদী কাৰ্যসূচীত অংশগ্ৰহণ কৰি শতাধিক প্ৰতিবাদকাৰীয়ে জাতিধ্বংসী নাগৰিকত্ব বিধেয়কখন বাতিলৰ দাবী উত্থাপন কৰে।
এই প্ৰতিবাদী কাৰ্যসূচীতে অংশগ্ৰহণ কৰি জ্যেষ্ঠ বাওঁপন্থী নেতা সীতাৰাম য়েচুৰীয়ে স্পষ্ট কৰি দিয়ে যে চি পি এমে সাংসদৰ বাহিৰে-ভিতৰে নাগৰিকত্ব সংশোধনী বিধেয়কখনৰ তীব্ৰ বিৰোধিতা কৰি যাব। তেওঁ লগতে নাগৰিকত্ব সংশোধনী বিধেয়কখন অসাংবিধানিক বুলিও উল্লেখ কৰে।
আনহাতে, ধৰ্মৰ ভিত্তিত নাগৰিকত্ব প্ৰদান কৰিলে ভাৰতৰ ধৰ্মনিৰপেক্ষ নীতিয়েই সলনি হৈ যাব বুলিও সদৰী কৰে বাঁওপন্থী নেতাজনে।