বিগত বছৰটোৰ শেষৰ দিনটোত হিমন্ত বিশ্ব শৰ্মা চৰকাৰৰ কেবিনেটে চাৰিখন জিলা বিলুপ্তি কৰা কাৰ্যই বিজেপি চৰকাৰৰ দূৰদৃষ্টিহীনতাকে প্ৰতিপন্ন কৰিলে। এই অভিযোগ আম আদমি পাৰ্টীৰ।
যোৱা নিৰ্বাচনৰ পূৰ্বে অকল ভোট লাভৰ আশাত আগ-গুৰি চিন্তা নকৰি কেবাখনো জিলা গঠন কৰি সেইবোৰৰ একাংশ এতিয়া পুনৰ মহকুমালৈ অৱনমিত কৰা কাৰ্য টোগলগী কাণ্ডৰ নামান্তৰ মাত্ৰ।
কেবিনেট সিদ্ধান্তৰ পাছত মুখ্যমন্ত্ৰী শৰ্মাই এই বিলুপ্তিকৰণৰ বিষয়ে ঘোষণা কৰি এনে সিদ্ধান্ত ‘জাতিৰ স্বাৰ্থত’ ল’বলগীয়া হৈছে বুলি উল্লেখ কৰিছে।
জাতিৰ স্বাৰ্থত ল’বলগীয়া হোৱা এই সিদ্ধান্ত কি কাৰণে জাতিক জনোৱা হোৱা নাই? এই প্ৰশ্ন আপৰ ৰাজ্যিক সমন্বয়ক ডা৹ ভবেন চৌধুৰীৰ।
এই বিলুপ্তিকৰণ জাতিৰ স্বাৰ্থত বুলি মুখ্যমন্ত্ৰীয়ে প্ৰকাশ কৰি জাতিটোক আন্ধাৰত ৰখাত আম আদমি পাৰ্টী বিজেপি চৰকাৰৰ প্ৰতি সন্দিহান হৈ পৰিছে। বিজেপিৰ গুপ্ত লক্ষ্য-উদ্দেশ্য ৰূপায়ণৰ বাবে এনেদৰে চৰকাৰে ৰাইজক আন্ধাৰত ৰাখি কাম কৰিলে চৰকাৰখনে গণতান্ত্ৰিক চৰিত্ৰ হেৰুৱাই পেলাব বুলি সতৰ্ক কৰি দিয়ে দলটোৱে।
উল্লেখ্য যে সমষ্টিৰ পুনৰ গঠনৰ বাবে নিৰ্বাচন আয়োগৰ নিৰ্দেশনা কাৰ্যকৰী হোৱাৰ পূৰ্বে ততাতৈয়াকৈ বিশ্বনাথ, হোজাই, বজালী আৰু তামুলপুৰ জিলাক পূৰ্বৰ জিলাৰ লগত চামিলকৰণৰ সিদ্ধান্ত গ্ৰহণ কৰিছে ৰাজ্যিক কেবিনেটে।
