চীনৰ এটি ১৩ বছৰীয়া কিশোৰে দখল কৰিছে সংবাদ মাধ্যমৰ শিৰোনাম। প্ৰসৱৰ সময়ত নিজ মাতৃক সহায় কৰি চৰ্চালৈ আহিছে ১৩ বছৰীয়া কিশোৰটি।
ঘটনাৰ বিৱৰণ অনুসৰি, হঠাতে কিশোৰটিৰ অন্তসত্তা মাতৃ অসুস্থ হৈ পৰে। আনকি, গৰ্ভজাত সন্তানটিৰ প্ৰসৱ প্ৰক্ৰিয়া আৰম্ভ হ’বলৈ ধৰে। কিন্তু সেই সময়ত ঘৰত মহিলাগৰাকীৰ স্বামী বা কোনো জ্যেষ্ঠ লোক ঘৰত নাছিল।
সেই সময়তে মাতৃক যন্ত্ৰণাত ছটফটাই থকা দেখি কিশোৰটিয়ে চিকিৎসকৰ বাবে অপেক্ষা নকৰি মাতৃক সহায় কৰিবলৈ আগবাঢ়ি আহি পৰিস্থিতি চম্ভালি লয়। শিশুটিয়ে মাতৃৰ সন্তান প্ৰসৱৰ দায়িত্ব কান্ধত তুলি লয়।
কিশোৰটিৰ যত্ন আৰু সহায়ত মাতৃগৰাকীয়ে শিশুটিক ঘৰতে জন্ম দিয়ে। ইয়াৰ সমান্তৰালকৈ কিশোৰটিয়ে জৰুৰীকালিনি স্বাস্থ্য সেৱাত খবৰ দিয়ে।
এম্বুলেন্স অহালৈকে কিশোৰটিয়ে নিজৰ মাতৃ আৰু নৱজাত শিশুৰ স্বাস্থ্যৰ নজৰ ৰাখে। কিছু সময়ৰ পাছত তেওঁলোকৰ ঠিকনাত উপস্থিত হয়হি স্বাস্থ্যকৰ্মী। তাৰপিছত মহিলা আৰু শিশুটিক চিকিৎসা পৰ্যবেক্ষণৰ বাবে চিকিৎসালয়লৈ প্ৰেৰণ কৰা হয়। সম্প্ৰতি মাতৃ আৰু কেঁচুৱা উভয়ৰে স্বাস্থ্য ভাল বুলি জানিব পৰা গৈছে।
ছচিয়েল মিডিয়াত বিয়পি পৰিছে এই ঘটনা। বহুতে কিশোৰটিৰ সাহসক প্ৰশংসা কৰিছে। আনহাতে, কিছুমান লোকে মহিলাগৰাকীৰ স্বামীৰ ভূমিকাক লৈ প্ৰশ্ন উত্থাপন কৰিছে।
