কৰ’না পৰিস্থিতিৰ বাবে অতি কম সংখ্যক টেষ্ট মেচ খেলিলেও চলিত বছৰত ভাৰতীয় ক্ৰিকেট দলে সফলতাৰ মুখ দেখা নাই।
অষ্ট্ৰেলিয়াৰ বিৰুদ্ধে বক্সিং ডে’ টেষ্টত অৱতীৰ্ণ হোৱাৰ পূৰ্বে এডিলেইডৰ লজ্জাজনক পৰাজয় মচি দিয়াৰ আগেয়ে টেষ্ট ক্ৰিকেটৰ ইতিহাসত আন এক ৮৮বছৰ পুৰণি লজ্জাজনক অভিলেখৰ সন্মুখত থিয় হৈছে টীম ইণ্ডিয়া।
যদিহে ভাৰতে মেলবৰ্ণ টেষ্ট জিকিব বা ড্ৰ’ কৰিব নোৱাৰে তেতিয়াহ’লে ৮৮বছৰত প্ৰথমবাৰ একটা কেলেণ্ডাৰ বৰ্ষত (কমেও তিনিখন টেষ্ট) আটাইকেইখন টেষ্টত পৰাজিত হোৱা দেশ হিচাপে পৰিগণিত হ’ব।
ইয়াৰ পূৰ্বে টেষ্ট ক্ৰিকেটত ১৮বাৰ এনে ঘটনা ঘটিছে। বাংলাদেশৰ ক্ষেত্ৰত এনে ঘটনা ৫বাৰ ঘটিছে। জিম্বাবুৱে, অষ্ট্ৰেলিয়া আৰু দক্ষিণ আফ্ৰিকাৰ ক্ষেত্ৰত ৩ বাৰকৈ ঘটিছে এনে ঘটনা।
আনহাতে, ইংলেণ্ড, ৱেষ্ট ইণ্ডিজ, নিউজিলেণ্ড আৰু শ্ৰীলংকাৰ ক্ষেত্ৰত এবাৰকৈ এনে ঘটনা ঘটিছে।
ভাৰতে চলিত বছৰত ইতিমধ্যে ৩খন টেষ্ট মেচ খেলিছে। ইয়াৰ ভিতৰত দুখনত নিউজিলেণ্ডৰ বিৰুদ্ধে আৰু এখনত অষ্ট্ৰেলিয়াৰ বিৰুদ্ধে পৰাজিত হৈছে।
এতিয়া ৰাহানেৰ নেতৃত্বত ভাৰতীয় দলে এনে লজ্জাজনক দৃষ্টান্তৰ পৰা কেনেকৈ হাত সাৰিব পাৰে সেয়া লক্ষ্যণীয় হৈ পৰিছে।
বিগত ছিৰিজত ভাৰতে মেলবৰ্ণত টেষ্ট জিকিছিল। কিন্তু ইয়াত খেলা ১৩খন টেষ্টৰ ভিতৰত মাত্ৰ তিনিখনতহে জিকিছে ভাৰত। সেয়ে, ভাৰতৰ ওপৰতেই চাপ থকাটো নিশ্চিত।
