কৰ্ণাটকৰ এজন ব্যক্তিয়ে নিজৰ অস্বাভাৱিক খাদ্যাভ্যাসৰ বাবে সকলোৰে দৃষ্টি আকৰ্ষণ কৰিছে। চাউল বা ৰুটিৰ দৰে নিয়মীয়া খাদ্য খোৱাৰ সলনি গাড়ীৰ পোৰা মোবিল (জ্বলি যোৱা ইঞ্জিনৰ তেল) খায়েই তেওঁ জীয়াই থাকে।
ইনষ্টাগ্ৰামৰ এটা পোষ্টত তেওঁৰ খাদ্যৰ কথা উল্লেখ কৰাৰ পিছতে ভাইৰেল হৈ পৰে লোকজনৰ জীৱনশৈলী। উল্লেখযোগ্য যে ৩০ বছৰতকৈ অধিক সময় ধৰি তেওঁৰ খাদ্যাভ্যাসৰ কোনো পৰিৱৰ্তন হোৱা নাই। তেওঁ শাৰীৰিকভাৱে অসুস্থও হোৱা নাই।
কৰ্ণাটকৰ শিৱমোগ্গা জিলাৰ বাসিন্দা এই লোকজনৰ নাম ‘ৱেল কুমাৰ’। ইনষ্টাগ্ৰাম পোষ্টটোত উল্লেখ কৰা হৈছে যে লোকজনে দৈনিক সাতৰ পৰা আঠ লিটাৰ জ্বলা তেল খায়। ইয়াৰ উপৰিও তেওঁ নিয়মিতভাৱে চাহো খায়। যদিও চাহ সাধাৰণ পানীয়, কিন্তু পোৰা মোবিল অতি বিষাক্ত আৰু ইয়াক সেৱন কৰাটো নিৰাপদ নহয়।
ভাইৰেল ভিডিঅ’টোত দেখা গৈছে যে মানুহে তেওঁক খাদ্য আগবঢ়াইছে। কিন্তু কুমাৰে নাকচ কৰিছে। বৰঞ্চ বটলৰ পৰা ইঞ্জিনৰ তেল খাই থকা দেখা গৈছে। বছৰ বছৰ ধৰি স্বাস্থ্যজনিত কোনো বিৰূপ প্ৰভাৱ পৰা নাই
দশক দশক ধৰি জ্বলি যোৱা তেল লৈ জীয়াই থকাৰ পিছতো তেওঁ কেতিয়াও চিকিৎসালয়ত ভৰ্তি হ’বলগীয়া হোৱা নাই। পোষ্টটোত উল্লেখ কৰা হৈছে যে তেওঁ কোনো ডাঙৰ স্বাস্থ্যজনিত সমস্যাৰ সন্মুখীন হোৱা নাই যাৰ বাবে চিকিৎসাৰ প্ৰয়োজন হৈছিল।
তেওঁৰ মতে ঐশ্বৰিক সমৰ্থন অবিহনে তেওঁৰ বাবে ইমান বছৰ ধৰি এনে অস্বাভাৱিক খাদ্য খাই জীয়াই থকাটো সম্ভৱ নহ’লহেঁতেন।
