ভাৰত-চীন সৈন্যৰ মাজত লাডাখ সীমান্তৰ উত্তেজনা কিছু স্তিমিত হ’লেও উত্তেজনাৰ শাম এতিয়াও কটা নাই দুই দেশৰ মাজত।
লাডাখৰ পাংগং হ্ৰদ আৰু তাৰ আশে পাশে এতিয়াও চীনা সৈন্যৰ ভিৰ উপগ্ৰহীয় চিত্ৰত ধৰা পৰাৰ সমান্তৰালভাৱে এতিয়া চীনে উত্তৰাখণ্ডৰ ভাৰত চীন সীমান্ততো সেনা মোতায়েন কৰাৰ খবৰ আহিছে।
উত্তৰাখণ্ডৰ চামুলি জিলাৰ লিপুলেখ গিৰিপথ এলেকাত চীনে সৈন্য মোতায়েন কৰাৰ লগতে ইন্দো-তিব্বেত সীমান্তৰ প্ৰকৃত নিয়্ন্ত্ৰণ ৰেখাত চীনা সৈন্যৰ নজৰদাৰীত্ব বৃদ্ধি কৰিছে।
উল্লেখ্য যে, উত্তৰাখণ্ডৰ লিপুলেখ গিৰিপথ হৈছে ভাৰত-নেপাল-চীন সীমান্তৰ এলেকা।
সেয়ে লিপুলেখ হৈছে নতুন দিল্লীৰ বাবে কূটনৈতিকভাৱে অতি গুৰুত্বপূৰ্ণ।
ইতিমধ্যে নেপালৰ সংসদত নতুনকৈ গৃহীত কৰা নেপালৰ মানচিত্ৰত উত্তৰাখণ্ডৰ কালাপানী, লিম্পিয়াধুৰাৰ লগতে এই লিপুলেখ গিৰিপথো নেপালৰ ভূখণ্ড বুলি নেপালে দাবী কৰিছে।
তিব্বতৰ কৈলাস তথা মানস সৰোবৰলৈ যোৱাৰ পথটোৰ লিপুলেখ পৰ্যন্ত ভাৰতে প্ৰায় ৮০ কিলোমিটাৰ পথ নিৰ্মাণ কৰাৰ পিছতে নেপালে ভাৰতৰ প্ৰতি অসন্তুষ্টি ব্যক্ত কৰি আহিছে।
উল্লেখ্য যে যোৱা মাৰ্চ মাহত ভাৰতৰ প্ৰতিৰক্ষা মন্ত্ৰী ৰাজনাথ সিঙে উক্ত নৱনিৰ্মিত পথছোৱা উদ্বোধন কৰাৰ পিছতেই উক্ত অঞ্চলটোত উত্তেজনা সৃষ্টিৰ বাবে বেইজিঙে নেপালক উচটনি দিয়া বুলি কূটনৈতিক মহলে ধাৰণা কৰিছে।
ভাৰতীয় সেনাৰ সূত্ৰৰ মতে উত্তৰাখণ্ডৰ উক্ত লিপুলেখ গিৰি পথৰ সমীপতে অস্ত্ৰ-শস্ত্ৰসহ ৰছদ পাতিৰে চীনে প্ৰায় ১০০০ চীনা সৈন্য মোতায়েন কৰিছে।
ইফালে ছিকিমৰ লগতে অৰুণাচল প্ৰদেশলৈ ভাৰত-চীন সীমান্তৰ প্ৰকৃত নিয়ন্ত্ৰণ ৰেখাত চীনে সেনা সঞ্চালন তথা তৎপৰতা বৃদ্ধি কৰিছে বুলি ভাৰতীয় সেনাই প্ৰকাশ দিছে।
