গোৱালপাৰাৰ ম’ৰেল পুলিচিঙৰ ঘটনা : তিনিজনক গ্ৰেপ্তাৰ
ছ’চিয়েল মিডিয়াত ভাইৰেল হৈ পৰা গোৱালপাৰাৰ কৃষ্ণাইৰ অসম মেঘালয় সীমান্তত সংঘটিত ম’ৰেল পুলিচিঙৰ ঘটনাৰ লগত জড়িত তিনিজন যুৱকক গ্ৰেপ্তাৰ কৰা হৈছে।
ধৃত অভিযুক্ত যুৱক কেইজনক অমিয় ৰাভা, অপূৰ্ব ৰাভা আৰু সমীৰণ ৰাভা বুলি চিনাক্ত কৰা হৈছে। গোৱালপাৰা জিলা অতিৰিক্ত আৰক্ষী অধীক্ষক আৰু উপ-আৰক্ষী অধীক্ষকৰ নেতৃত্বত আৰক্ষীৰ এটা দলে অভিযান চলাই এওঁলোকক গ্ৰেপ্তাৰ কৰে।
উল্লেখযোগ্য যে দেওবাৰে অসম-মেঘালয় সীমান্তৰ হাতীচোঙৰ গুৰিয়া বনাঞ্চলত এহাল যুৱক-যুৱতীক একাংশ লোকে অসৎ কাৰ্যত লিপ্তৰ থকাৰ অভিযোগ তুলি মাৰপিট কৰি গাৰ কাপোৰ খুলি পেলোৱাৰ লগতে সমগ্ৰ দৃশ্য মোবাইলৰ কেমেৰাত ৰেকৰ্ডিং কৰি ছ’চিয়েল মিডিয়াত ভাইৰেল কৰিছিল।
লগতে পঢ়ক গোৱালপাৰাত ম’ৰেল পুলিচিঙৰ ঘটনা; যুৱক-যুৱতীক উলংগ কৰি মাৰপিটৰ দৃশ্য ৰেকৰ্ডিং কৰি WhatsAppত ভাইৰেল
পিছত যুৱতী গৰাকীৰ পৰিয়ালৰ লোকে থানাত দিয়া গোচৰৰ ভিত্তিত গোৱালপাৰা আৰক্ষীয়ে অভিযান চলাই আজি যুৱককেইজনক গ্ৰেপ্তাৰ কৰে।
তেওঁলোকৰ বিৰুদ্ধে ভাৰতীয় দণ্ডবিধিৰ ৩৫৪ (বি)/৩৪ ধাৰা, POCSO আইনৰ ৮ নং ধাৰা আৰু তথ্য প্ৰযুক্তি আইনৰ ৬৭ (এ) ধাৰাৰ অধীনত ২৪৮/১৯ নম্বৰৰ এক গোচৰ ৰুজু কৰা হৈছে আৰক্ষীৰ সূত্ৰত প্ৰকাশ।
ইফালে ম’ৰেল পুলিচিঙৰ নামত বেয়াকৈ নিৰ্যাতনৰ সন্মুখীন হোৱা যুৱক-যুৱতী হাল আনকি চিকিৎসালয়ত ভৰ্তি হ’বলগীয়া হৈছিল। ভুক্তভোগী যুৱতী গৰাকী গাৰো সম্প্ৰদায়ৰ বুলি জানিব পৰা গৈছে।