ছত্তীশগড়ৰ বিজাপুৰত আই ই ডি বিস্ফোৰণত আহত তিনিজন কেন্দ্ৰীয় সংৰক্ষিত আৰক্ষী বাহিনীৰ জোৱান
ছত্তীশগড়ৰ মাওবাদী প্ৰভাৱিত বিজাপুৰত সন্দেহযুক্ত মাওবাদীয়ে ৰোপণ কৰা আই ই ডিত ৩ নিৰাপত্তাৰক্ষী আহত হৈছে।
আৰক্ষীয়ে জনোৱা মতে, কেন্দ্ৰীয় সংৰক্ষিত আৰক্ষী বাহিনীৰ জোৱানৰ এটা দল আৱাপল্লীৰ পৰা বাছাগুদালৈ যোৱা পথত একাংশ জোৱান আক্ৰমণৰ বলি হয়।
আহত জোৱানসকলৰ ভিতৰত দুজন জোৱানৰ অৱস্থা সংকটজনক হৈ আছে। দুয়োজন জোৱানক উন্নত চিকিৎসাৰ বাবে ৰায়পুৰলৈ প্ৰেৰণ কৰা হৈছে।
বিগত ১৬ মাহ ধৰি ছত্তীশগড়ত মাওবাদীৰ বিৰুদ্ধে নিৰাপত্তা বাহিনীয়ে এক বৃহৎ অভিযান চলাই আহিছে।
গৃহমন্ত্ৰী অমিত শ্বাহে অহা বছৰৰ ৩১ মাৰ্চৰ ভিতৰত সমগ্ৰ দেশৰ পৰা মাওবাদৰ অন্ত পেলাবলৈ সময়সীমা নিৰ্ধাৰণ কৰিছে। এই কাৰণেই নিৰাপত্তাৰক্ষীৰ টহল বৃদ্ধি পাইছে।
এই সময়ছোৱাত মাওবাদীয়েও অবিৰতভাৱে আক্ৰমণ চলাই আছে।
চলিত বৰ্ষৰ আৰম্ভণিতে ৬ জানুৱাৰীত বিজাপুৰ জিলাত সংঘটিত হোৱা আই ই ডি বিস্ফোৰণত ৮জন নিৰাপত্তাৰক্ষী আৰু এজন চালকৰ মৃত্যু হৈছিল।
যোৱা মাহৰ ১০ তাৰিখে চুকমা জিলাত সন্দেহযুক্ত মাওবাদীয়ে সংঘটিত কৰা আই ই ডি বিস্ফোৰণত এজন অতিৰিক্ত আৰক্ষী অধীক্ষক নিহত হৈছিল।ইয়াৰ পূৰ্বে ৬ মে’ত বিজাপুৰত সংঘটিত হোৱা আই ই ডি বিস্ফোৰণত চি আৰ পি এফৰ সহকাৰী কামাণ্ডেণ্ট সাগৰ বৰাডে এখন ভৰি হেৰুৱাইছিল।