স্বাধীনতা দিৱসৰ পূৰ্বে কূটাঘাতেৰে অসমক ৰক্তাক্ত কৰাৰ পৰিকল্পনাত ব্যস্ত থকা তিনিগৰাকী জেহাদীক মঙলবাৰে বৰপেটা আৰক্ষীয়ে গ্ৰেপ্তাৰ কৰিবলৈ সক্ষম হয়।
চোৰাংচোৱাৰ গোপন খবৰৰ ভিত্তিত মঙলবাৰে নিশা অভিযান চলাই আৰক্ষীয়ে হাফিজুৰ ৰহমান, ইয়াকুব আলী আৰু ছৰিফুল ইছলামক গ্ৰেপ্তাৰ কৰিবলৈ সক্ষম হয়।
ধৃত হাফিজুৰ ৰহমান বৰপেটা জিলাৰ কাৰাগাড়ী গাঁৱৰ ৰহিজুদ্দিনৰ পুত্ৰ তথা জে এম বিৰ সদস্য।
আৰক্ষীয়ে অভিযানকালত হাফিজুৰৰ ঘৰৰ পৰা চাৰি জাঁই সক্ৰিয় গুলী আৰু এটা হস্তনিৰ্মিত পিষ্টল উদ্ধাৰ কৰে।
উত্তৰ প্ৰদেশৰ এখন মাদ্ৰাছাত অধ্যয়ন কৰা হাফিজুৰে শিক্ষা সমাপ্ত কৰাৰ পাছত কেৰেলাত কাম কৰিবলৈ গৈছিল আৰু পৰৱৰ্তী সময়ত অসমলৈ উভতি আহি ফেৰীৱালা হিচাপে কাম কৰিছিল।
উল্লেখযোগ্য যে, বৰপেটা জিলাখন ক্ৰমান্বয়ে জেহাদীৰ ঘাটিত পৰিণত হৈছে। ইছলামিক সন্ত্ৰাসবাদী সংগঠন জামাতুল মুজাহিদিনে জিলাখনত গোপনে সন্ত্ৰাসবাদী কাৰ্য্যকলাপ বৃদ্ধি কৰিছে বুলি জানিব পৰা গৈছে।
বিগত সময়ছোৱাত কেইবাগৰাকী জামাতুল মুজাহিদিনৰ সদস্য গ্ৰেপ্তাৰ হোৱাৰ পাছত মঙলবাৰে নিশা অস্ত্ৰ-শস্ত্ৰসহ তিনিজন দুৰ্ধৰ্ষ জেহাদী গ্ৰেপ্তাৰ হোৱা ঘটনাই জিলাখনত তীব্ৰ চাঞ্চল্যৰ সৃষ্টি কৰিছে।
