সংসদত প্ৰতিৰক্ষা মন্ত্ৰী ৰাজনাথ সিঙে অপাৰেশ্যন সিন্দুৰৰ বিতৰ্ক আৰম্ভ কৰাৰ সময়তে আজি শ্ৰীনগৰৰ সমীপত হোৱা এক এনকাউণ্টাৰত তিনিটা পাকিস্তানী সন্ত্ৰাসবাদীক গুলীয়াই হত্যা কৰে ভাৰতীয় নিৰাপত্তা বাহিনীয়ে।
জানিব পৰা মতে, ইয়াৰে দুজন পেহেলগাম আক্ৰমণৰ সৈতে জড়িত।
উল্লেখ্য যে যোৱা ২২ এপ্ৰিলত দেশ কঁপাই যোৱা পেহেলগাম সন্ত্ৰাসবাদী আক্ৰমণৰ মাষ্টাৰমাইণ্ড হিচাপে চিনাক্ত কৰা হৈছিল লস্কৰ-ই-টাইবাৰ সন্ত্ৰাসবাদী চুলেইমান শ্বাহক।
আজি পুৱা হোৱা এনকাউণ্টাৰত নিহত সন্ত্ৰাসবাদীৰ ভিতৰত চুলেইমান শ্বাহো আছিল বুলি নিৰাপত্তা সূত্ৰই নিশ্চিত কৰিছে।
সেনাই এই অভিযানত গুলীয়াই হত্যা কৰা আন দুটা সন্ত্ৰাসবাদী হ’ল আবু হামজা আৰু ইয়াছিৰ। পেহেলগাম কাণ্ডৰ হত্যাকাৰীৰ ভিতৰত ইয়াছিৰো আছিল বুলি ধাৰণা কৰা হৈছে।
এই অভিযানৰ অংশ আছিল ভাৰতীয় সেনা, চি আৰ পি এফ আৰু জম্মু-কাশ্মীৰ আৰক্ষীৰ নিৰাপত্তা বাহিনী।
জানিব পৰা মতে, চুলেইমানে পাকিস্তান সেনাবাহিনীত সেৱা আগবঢ়াইছিল আৰু হাছিম মুছা নামেৰেও পৰিচিত আছিল। পহলগামৰ বৈছাৰণ উপত্যকাত সংঘটিত সন্ত্ৰাসবাদী আক্ৰমণৰ পৰিণতিত জম্মু-কাশ্মীৰ আৰক্ষীয়ে চুলেমান সম্পৰ্কে যিকোনো ব্যক্তিক তথ্য প্ৰদান কৰিলে ২০ লাখ টকাৰ পুৰস্কাৰ ঘোষণা কৰিছিল।
ভাৰতীয় সেনাৰ চিনাৰ কৰ্পছৰ অফিচিয়েল এক্স একাউণ্টত পূৰ্বে পোষ্ট কৰা হৈছিল যে নিৰাপত্তা বাহিনীয়ে লিডৱাছত অপাৰেচন মহাদেৱ আৰম্ভ কৰিছে।
জানিব পৰা মতে, সেনাৰ গুলীত নিহত আটাইকেটা সন্ত্ৰাসবাদী আছিল বিদেশী নাগৰিক।
সূত্ৰ অনুসৰি এই এনকাউণ্টাৰৰ সময়ত কাৰ্বাইন আৰু এ কে-৪৭ ৰাইফল, ১৭টা ৰাইফল গ্ৰেনেড আৰু অন্যান্য অস্ত্ৰ-শস্ত্ৰ আৰু গোলাবাৰুদ উদ্ধাৰ কৰা হয়। সন্ত্ৰাসবাদীয়ে জম্মু-কাশ্মীৰত এক বৃহৎ কাৰ্যকলাপৰ পৰিকল্পনা কৰিছিল বুলি নিৰাপত্তা বাহিনীয়ে সন্দেহ প্ৰকাশ কৰিছে।
