আজি অসমৰ ওদালগুৰি জিলালৈ আহিব কেন্দ্ৰীয় ৰেচম বিভাগৰ মন্ত্ৰী স্মৃতি ইৰাণী আৰু কেন্দ্ৰীয় গৃহ ৰাজ্য মন্ত্ৰী কিৰেন ৰিজিজু। জানিব পৰা মতে দুয়োগৰাকী মন্ত্ৰীয়ে ওদালগুৰি সাপেখাইটিস্থিত ৰেচম বিভাগৰ সহকাৰী সঞ্চালকৰ কাৰ্যালয় চৌহদত ৰেচম বিভাগৰ বিভিন্ন দিশ সম্পৰ্কে পৰ্যালোচনা কৰিব।
অৰুণাচলৰ পৰা বিশেষ হেলিকপ্টাৰযোগে ওদালগুৰিত অৱতৰণ কৰিব দুয়োগৰাকী মন্ত্ৰী। তাৰ পাছতে বিশাল কনভয়ৰ সহায়ত তেওঁলোক সাপেখাইটিস্থিত ৰেচম বিভাগৰ সহকাৰী সঞ্চালকৰ কাৰ্যালয়লৈ ৰাওনা হ’ব বুলি এক সূত্ৰই প্ৰকাশ কৰে।
ইতিমধ্যে দুয়োগৰাকী কেন্দ্ৰীয় মন্ত্ৰীক আদৰিবলৈ ওদালগুৰি জিলা প্ৰশাসন, আৰক্ষীৰ লগতে ৰেচম বিভাগ সাজু হৈ উঠিছে। আৰক্ষীৰ শীৰ্ষ সূত্ৰৰ পৰা জানিব পৰা অনুসৰি মন্ত্ৰী দুগৰাকীৰ ভ্ৰমণৰত সময়ত দৈনন্দিন নিৰাপত্তা ব্যৱস্থাৰ লগতে সামগ্ৰিকভাৱে নিৰাপত্তাৰ দিশটো চোৱা-চিতা কৰিবলৈ ভাৰতীয় সেনা আৰু কোব্ৰাক নিয়োগ কৰা হ’ব।
উল্লেখযোগ্য যে ওদালগুৰিৰ ৰেচম বিভাগে ইতিমধ্যে বিশ্বত এক সুকীয়া স্থান দখল কৰিবলৈ সক্ষম হৈছে। তদুপৰি ৰেচম বিভাগৰ কাৰ্যালয়টোৰ লগতে উৎপাদনস্থলী পৰিদৰ্শনৰ বাবে বিভিন্ন সময়ত দেশী-বিদেশী পৰ্যটকে ভিৰ কৰাও পৰিলক্ষিত হয়।
