পাকিস্তানৰ সিন্ধ প্ৰদেশত কুখ্যাত লস্কৰ সন্ত্ৰাসবাদী ছইফুল্লাহ খালিদ দুস্কৃতিকাৰীৰ আক্ৰমণত নিহত হৈছে। দেওবাৰে সংবাদ প্ৰতিষ্ঠানৰ পৰা এই খবৰ লাভ কৰা হৈছে। তেওঁ ভাৰতত একাধিক সন্ত্ৰাসবাদী আক্ৰমণৰ সৈতে জড়িত আছিল। তেওঁক লস্কৰ-ই-তৈবা (LeT)ৰ এজন শীৰ্ষস্থানীয় নেতা আছিল বুলি কোৱা হয়।
পাকিস্তানৰ সিন্ধ প্ৰদেশৰ বাদিন জিলাৰ মাটলি অঞ্চলত খালিদক আক্ৰমণ কৰা হয়। কোনে হত্যা কৰিলে সেয়া এতিয়াও স্পষ্ট হোৱা নাই। অৱশ্যে সংশ্লিষ্ট মহলে তেওঁৰ মৃত্যু যথেষ্ট তাৎপৰ্যপূৰ্ণ বুলি ধাৰণা কৰে।
২০০১ চনত ৰামপুৰৰ চি আৰ পি এফ শিবিৰত আক্ৰমণ, ২০০৫ চনত বেংগালুৰুত ভাৰতীয় বিজ্ঞান কংগ্ৰেছত আক্ৰমণ, ২০০৬ চনত নাগপুৰত আৰ এছ এছৰ মুখ্য কাৰ্যালয়ত আক্ৰমণৰ মাষ্টাৰমাইণ্ড আছিল ছইফুল্লা। এই তিনিটা আক্ৰমণত বহু লোকে প্ৰাণ হেৰুৱাইছিল।
সূত্ৰ অনুসৰি তেওঁ দীৰ্ঘদিন ধৰি ‘বিনোদ কুমাৰ’ নামত ভুৱা পৰিচয়ৰে নেপালত আছিল। নাগমা বানু নামৰ স্থানীয় মহিলা এগৰাকীকো বিয়া কৰাইছিল। তেওঁ নেপালৰ পৰা লস্কৰৰ হৈ ভাৰত বিৰোধী কাম-কাজ চলাই আছিল। এই ক্ষেত্ৰত তেওঁৰ মূল কাম আছিল নতুন সদস্য নিযুক্তি দিয়া আৰু উগ্ৰপন্থী কাৰ্যকলাপৰ বাবে লজিষ্টিক সহায় আগবঢ়োৱা।
কেইবছৰমানৰ আগতে তেওঁ নেপালৰ পৰা পাকিস্তানৰ সিন্ধ প্ৰদেশৰ বাদিন জিলাৰ মাটলি অঞ্চলত এটা ঘাটি স্থাপন কৰিছিল আৰু তাৰ পৰাই তেওঁ লস্কৰ-ই-তৈবা আৰু ইয়াৰ সংযুক্ত সংস্থা জামাত-উদ-দাৱাৰ বাবে কাম কৰি গৈছিল। সদস্য নিযুক্তি আৰু ধন সংগ্ৰহৰ ক্ষেত্ৰত তেওঁৰ ভূমিকা অতি গুৰুত্বপূৰ্ণ আছিল।
তেওঁৰ মৃত্যুক লৈ এতিয়ালৈকে পাকিস্তান চৰকাৰৰ পৰা কোনো মন্তব্য দিয়া হোৱা নাই। অৱশ্যে ভাৰতীয় নিৰাপত্তা সংস্থাসমূহে এই ঘটনাক ইতিবাচক দৃষ্টিৰে চাইছে। ছইফুল্লাহ খালিদৰ দৰে কুখ্যাত উগ্ৰপন্থীৰ মৃত্যু লস্কৰৰ বাবে এক বৃহৎ আঘাত বুলি বিবেচিত হৈছে।
