টীয়কৰ তামুলীছিগাত ‘কা’ৰ বিৰুদ্ধে আছুৰ জোঁৰ সমদল
আছু আৰু ৩০টা জনগোষ্ঠীয় সংগঠনৰ আহ্বানত আজি টীয়কৰ তামুলীছিগাত টীয়ক আঞ্চলিক ছাত্ৰ সন্থা, শিমলুগুৰি মৌজা আঞ্চলিক ছাত্ৰ সন্থা আৰু স্থানীয় ৰাইজে নাগৰিকত্ব (সংশোধন) আইনৰ বিৰুদ্ধে প্ৰতিবাদী জোঁৰ সমদল বাহিৰ কৰে।
তামুলীছিগাৰ পৰা বামুনপুখুৰীলৈকে সমদল কৰি প্ৰতিবাদকাৰীসকলে ‘কা আমি নামনো, বিজেপি গ’ বেক, সৰ্বানন্দ সোণোৱালৰ কাম নাই, বিজেপিক খেদাওক অসমক ৰক্ষা কৰক, জাতিদ্রোহী অগপ নিপাত যাওঁক, অতুল বৰা নিপাত যাওক’ আদি ধ্বনিৰে পৰিৱেশ উত্তাল কৰি তোলে।
যোৰহাট মহকুমা ছাত্ৰ সন্থাৰ সাংগঠনিক সম্পাদক যদুমণি বৰুৱাই কয়, প্ৰলোভনৰ ৰাজনীতিত ভোল নগৈ ২০২১ চনত হ’বলগীয়া নিৰ্বাচনত ৰাইজে এই জাতিদ্রোহীবোৰক যোগ্য প্ৰত্যুত্তৰ দিব।
আনহাতে টীয়ক আছুৰ সভাপতি ৰন্টু ভূঞাই সমবেত ৰাইজক উদ্দেশ্যি কয়, ‘ৰাইজে নায্য প্ৰাপ্তিৰ বাবে এই সংগ্ৰাম কৰিছে, কা বাতিল নোহোৱা পৰ্যন্ত এই সংগ্ৰাম চলিব থাকিব আৰু ৰাইজে ইয়াৰ সুফল পাবই।’
প্ৰতিবাদী সমদলত অধিবক্তা বিশ্বজিৎ নাথ, জগদুৱাৰ ‘কা’ বিৰোধী যুৱ সমাজ, বনাই সচেতন মহিলা সমাজ, শিমলুগুৰি মৌজা আঞ্চলিক ছাত্ৰ সন্থা, টীয়ক আঞ্চলিক ছাত্ৰ সন্থা, টীয়ক আঞ্চলিক চুতীয়া ছাত্ৰ সন্থাৰ বিভিন্ন বিষয়ববীয়াৰ লগতে অগণন স্থানীয় লোক সমবেত হয়।