অহা ২১ অক্টোবৰত অনুষ্ঠিত হব লগা ৪৪ নং জনীয়া বিধান সভাৰ উপ নিৰ্বাচনৰ বাবে সোমবাৰে কেইবাটাও ৰাজনৈতিক দল আৰু নিৰ্দলীয় প্ৰাৰ্থীসহ মুঠ ৮ গৰাকী প্ৰাৰ্থীয়ে মনোনয়ন পত্ৰ দাখিল কৰে ৷
মনোনয়ন পত্ৰ দাখিলৰ বাবে দিনটোত বৰপেটা চহৰত কংগ্ৰেছ, বিজেপিৰ লগতে এ আই য়ু ডি এফৰ প্ৰাৰ্থীৰ লগতে প্ৰতিটো ৰাজনৈতিক দলৰ সমৰ্থকসকলে যথেষ্ট ভিৰ কৰা পৰিলক্ষিত হয় ৷
প্ৰথমে চি পি আই( এম)ৰ ৰুস্তম আলীয়ে মনোনয়ন পত্ৰ দাখিল কৰে ৷ ইয়াৰ পাছত কংগ্ৰেছৰ প্ৰাৰ্থী ছামচুল হকে ভালে সংখ্যক সমৰ্থকক লগতলৈ মনোনয়ন পত্ৰ দাখিল কৰে ৷
দিনৰ প্ৰায় ২ বজাত বিজেপিৰ প্ৰাৰ্থী তৌফিকুৰ ৰহমানেও সমৰ্থকক লগত লৈ মনোনয়ন পত্ৰ দাখিল কৰে ৷
আনহাতে, এ আই য়ু ডি এফৰ প্ৰাৰ্থী ৰফিকুল ইছলামেও বহু সংখ্যক সমৰ্থকক লগত লৈ জিলা উপায়ুক্তৰ কাৰ্যালয়ৰ সন্মুখত উপস্থিত হয় আৰু পাছত নিৰ্ধাৰিত সমৰ্থকক লগত লৈ প্ৰাৰ্থী গৰাকীয়ে মনোনয়ন পত্ৰ দাখিল কৰে ৷
ইপিনে, এন পি পিৰ চান্দ মাহমুদ, ডেমক্ৰেটিক পাৰ্টী অফ ইণ্ডিয়াৰ ৰফিকুল ইছলাম, নিৰ্দলীয় প্ৰাৰ্থী ক্ৰমে আব্দুল জলিল তালুকদাৰ আৰু সুভাষ সুত্ৰধৰেও মনোনয়ন পত্ৰ দাখিল কৰে ৷
মনোনয়ন পত্ৰ দাখিলৰ অন্তিম দিনা মুঠ ৮ গৰাকী প্ৰাৰ্থীয়ে মনোনয়ন পত্ৰ দাখিল কৰে ৷ ইয়াৰ পূৰ্বে ২৭ ছেপ্টেম্বৰত আম আদমী পাৰ্টীৰ ফাৰুক খানে মনোনয়ন পত্ৰ দাখিল কৰিছিল ৷
জনীয়াৰ উপ নিৰ্বাচনৰ বাবে সৰ্বমুঠ ৯ গৰাকী প্ৰাৰ্থীয়ে মনোনয়ন পত্ৰ দাখিল কৰে৷