মধ্য শ্ৰীলংকাৰ বন্যপ্ৰাণী অভয়াৰণ্যৰ সমীপত যাত্ৰীবাহী ৰে’লে খুন্দা মৰাৰ ফলত ৬টা হাতীৰ মৃত্যু ঘটে। ৰাজধানী কলম্বোৰ পূব দিশৰ হাবাৰানাত বৃহস্পতিবাৰে পুৱা সংঘটিত হয় এই ঘটনা।
স্থানীয় আৰক্ষীয়ে জনোৱা মতে, হাতীৰ জাকৰ সৈতে খুন্দা মৰাৰ ফলত ৰে’লখন ৰে’লপথৰ পৰা ওলাই যায় যদিও কোনো যাত্ৰী আহত হোৱা নাই। অৱশ্যে আহত দুটা হাতীৰ চিকিৎসা অব্যাহত আছে।
শ্ৰীলংকাত ৰে’লৰ সৈতে হাতীৰ জাকৰ সংঘৰ্ষ হোৱাটো অস্বাভাৱিক নহয়। হাতী-মানুহৰ সংঘাতত দুয়োপক্ষৰ হতাহতৰ সংখ্যা বিশ্বৰ ভিতৰতে সৰ্বাধিক দেশখনত। বিগত বছৰত এনে সংঘৰ্ষত ১৭০ জনতকৈ অধিক লোক আৰু প্ৰায় ৫০০ হাতীৰ মৃত্যু হৈছিল।
বনাঞ্চল ধ্বংস আৰু প্ৰাকৃতিক সম্পদৰ অভাৱৰ বাবে হাতী ক্ৰমান্বয়ে মানুহৰ বসতিস্থলত প্ৰৱেশ কৰিবলৈ ধৰিছে। স্থানীয় সংবাদ মাধ্যমৰ মতে, কেৱল ৰে’লৰ খুন্দাতে প্ৰতি বছৰে ২০টাকৈ হাতীৰ মৃত্যু হয়।
বিশেষজ্ঞসকলে ৰে’ল চালকসকলক লাহে লাহে ৰে’ল চলাবলৈ আৰু ৰে’লপথত হাতী থাকিলে ততাতয়াকৈ হৰ্ণ বজাবলৈ পৰামৰ্শ দিছে।
শ্ৰীলংকাত প্ৰায় সাত হাজাৰ বনৰীয়া হাতী আছে বুলি অনুমান কৰা হৈছে। বৌদ্ধ সংখ্যাগৰিষ্ঠ দেশখনত হাতী হত্যা কৰাটো অপৰাধ। ইয়াৰ বাবে শাস্তি হৈছে কাৰাদণ্ড বা জৰিমনা বিহা।
