কংগ্ৰেছৰ পৰা পদত্যাগ কৰি তৃণমূল কংগ্ৰেছত যোগ দিয়েই দায়িত্ব লাভ কৰাৰ পাছত এইবাৰ পদো লাভ কৰিলে অসমৰ প্ৰাক্তন কংগ্ৰেছী সাংসদ সুস্মিতা দেবে।
সুস্মিতা দেবক তৃণমূল কংগ্ৰেছে ৰাজ্যসভাৰ সাংসদ হিচাপে মনোনীত কৰিছে।
অহা ৪ অক্টোবৰত পশ্চিমবংগৰ একমাত্ৰ ৰাজ্যসভাৰ আসনখনৰ বাবে নিৰ্বাচন অনুষ্ঠিত হ’ব। তৃণমূলৰ বিধায়ক মানস ভূঞাই এৰি দিয়া আসনখনৰ বাবে সুস্মিতাক মনোনীত কৰা হৈছে।
বিধায়ক ভূঞা ২০২১ৰ বিধানসভা নিৰ্বাচনত বিজয়ী হৈ বৰ্তমান ৰাজ্যখনৰ মন্ত্ৰী হৈছে। সেয়ে, সেই ৰাজ্যসভাৰ আসনখনৰ বাবে উপ নিৰ্বাচন হ’ব।
মঙলবাৰে টুইট কৰি তৃণমূল কংগ্ৰেছে সুস্মিতা দেব ৰাজ্যসভাৰ প্ৰাৰ্থী কৰাৰ কথা ঘোষণা কৰে।
উল্লেখ্য যে যোৱা মাহত সুস্মিতা দেবে কংগ্ৰেছৰ সৈতে তেওঁৰ প্ৰায় ২০ বছৰীয়া সম্পৰ্ক ত্যাগ কৰি মমতা বেনাৰ্জীৰ তৃণমূল দলত নতুন ৰাজনৈতিক যাত্ৰা আৰম্ভ কৰে।
তৃণমূলত যোগ দিয়াৰ পাছতেই দলটোৱে সুস্মিতাক ত্ৰিপুৰাত সংগঠনৰ গুৰু দায়িত্ব অৰ্পন কৰিছে। এতিয়া ৰাজ্যসভাৰ সাংসদ হিচাপে পঠিওৱাৰ সিদ্ধান্তও ল’লে তৃণমূলে।
ইপিনে, ৰাজ্যসভাৰ প্ৰাৰ্থিত্বৰ খৱৰ লাভ কৰি আনন্দিত সুস্মিতা দেব। টুইট কৰি তেওঁ দলৰ প্ৰতি কৃতজ্ঞতাও প্ৰকাশ কৰিছে।
আনহাতে, তৃণমূল নেত্ৰী মমতা বেনাৰ্জীয়ে সংসদত আৰু মহিলা প্ৰতিনিধি বিচাৰে বুলি প্ৰকাশ কৰি সেই লক্ষ্যৰেই তেওঁক পঠিয়াব বিচাৰিছে বুলি সুস্মিতাই টুইটত উল্লেখ কৰে।
