আজি ত্ৰিপুৰা চৰকাৰে বিমান ইন্ধনৰ ওপৰত থকা ভেট ২শতাংশ কৰ্তন কৰিছে। ফলত পূৰ্বৰ ১৮শতাংশ ((VAT)) ভেটৰ পৰিৱৰ্তে এতিয়াৰে পৰা ১৬ শতাংশ ভেট বলৱৎ হ’ব।
ঘাইকৈ বিমান পৰিবহণ কোম্পানীসমূহে আগৰতলাত পৰিবহণ সেৱা চলোৱাত উৎসাহিত কৰাৰ বাবে এই পদক্ষেপ গ্ৰহণ কৰা হৈছে।
ত্ৰিপুৰাৰ উপ মুখ্য মন্ত্ৰী জিষ্ণু দেব বৰ্মাই কৈছে যে কেবিনেটত ভেট আইন-২০০৪ৰ সংশোধন কৰি বিমান ইন্ধনৰ কৰ ১৬ শতাংশ কৰা হৈছে। ইয়াৰ ফলত ৰাজ্য চৰকাৰে বছৰি ১.২০ কোটি টকাৰ ৰাজহ লোকচানৰ সন্মুখীন হ’ব বুলি তেওঁ প্ৰকাশ কৰে।
উল্লেখ্য যে পশ্চিম বংগ চৰকাৰে যোৱা ৩ বছৰৰ পৰাই বাগদোগ্ৰা বিমান বন্দৰত বিমান ইন্ধনৰ কৰ হ্ৰাস কৰাৰ উদাহৰণ দি আগৰতলালৈ অহা বিমানটো অতি কমেও ৫ শতাংশ কৰ হ্ৰাস কৰাৰ বাবে দাবী জনাই আহিছিল বিৰোধী কংগ্ৰেছ আৰু বিজেপি দলে।
বৰ্তমান অধিকাংশ বিমান বাগদোগ্ৰালৈ যায় আৰু প্ৰতি দিন তাত ২৫খনৰো অধিক বিমানে অৱতৰণ কৰে। ত্ৰিপুৰা প্ৰদেশ কংগ্ৰেছৰ সভাপতি বীৰজিত সিনহাই যুক্তি দৰ্শাইছে যে বাগদোগ্ৰা বিমান বন্দৰলৈ যাত্ৰী ভাড়া যথেষ্ট হ্ৰাস হোৱাৰ ফলত উত্তৰ বংগ, ছিকিম আৰু আনকি নেপালতো পৰ্যটন উদ্যোগটো শক্তিশালী হৈছে।
