আমেৰিকাত নিৰ্মিত আইফোনহে কেৱল আমেৰিকাতহে বিক্ৰী কৰিব পাৰিব। অন্যথা অতিৰিক্ত শুল্ক পৰিশোধ কৰিব লাগিব। নতুন ফতোৱা জাৰি কৰিছে ৰাষ্ট্ৰপতি ড’নাল্ড ট্ৰাম্পে। আমেৰিকাত বিক্ৰী হোৱা আন দেশত নিৰ্মিত আইফোনৰ ওপৰত ২৫ শতাংশ শুল্ক আৰোপ কৰা হ’ব। আমেৰিকাৰ ৰাষ্ট্ৰপতি ড’নাল্ড ট্ৰাম্পে এপলক এইদৰে সকীয়াই দিছে।
ট্ৰুথ ছ’চিয়েলত এটা পোষ্টত আমেৰিকাৰ ৰাষ্ট্ৰপতিগৰাকীয়ে কয় যে, “মই বহুদিনৰ পৰা এপলৰ টিম কুকক কৈ আহিছো যে তেওঁলোকে আমেৰিকাত বিক্ৰী কৰা আইফোনসমূহ ভাৰত বা আন কোনো ঠাইত নহয়, আমেৰিকাত নিৰ্মাণ কৰিব লাগিব। যদি সেয়া নহয়, তেন্তে এপলে আমেৰিকাক কমেও ২৫ শতাংশ শুল্ক দিব লাগিব।”
ৰাষ্ট্ৰপতি ট্ৰাম্পৰ সতৰ্কবাণীৰ পিছত প্ৰিমাৰ্কেট ট্ৰেডিঙত এপলৰ শ্বেয়াৰৰ মূল্য ২.৫ শতাংশ হ্ৰাস পায়। ফলত আমেৰিকাৰ ষ্টক ইনডেক্স ফিউচাৰৰ মূল্য হ্ৰাস পাইছে।
আমেৰিকা প্ৰশাসনে ব্যক্তিগত কোম্পানী এটাৰ ওপৰত এনেদৰে শুল্ক আৰোপ কৰিব পাৰে নেকি সেয়া স্পষ্ট নহয়। ট্ৰাম্পৰ এই ঘোষণাৰ পিছতে সংবাদ সংস্থা ৰয়টাৰে এপলৰ পৰা সঁহাৰি বিচাৰিছিল যদিও কোম্পানীটোৱে কোনো সঁহাৰি নিদিলে।
যোৱা মাহত প্ৰকাশ পোৱা বাতৰি অনুসৰি ট্ৰাম্পে চীনৰ ওপৰত অতিৰিক্ত শুল্ক আৰোপ কৰাৰ ফলত আইফোনৰ মূল্য বৃদ্ধিৰ আশংকা বৃদ্ধি পাইছে। এপলে ভাৰতক বিকল্প উৎপাদন কেন্দ্ৰ হিচাপে স্থান দিছে।
আইফোন নিৰ্মাতা কোম্পানীটোৱে লগতে জনায় যে জুন মাহত আমেৰিকাত বিক্ৰী হোৱা তেওঁলোকৰ অধিকাংশ স্মাৰ্টফোন ভাৰতৰ পৰা আহিব।
আমেৰিকাৰ বহুজাতিক সংস্থা এপলে ইয়াৰ বেছিভাগ সামগ্ৰী আমেৰিকাৰ বাহিৰত নিৰ্মাণ কৰে। এই কোম্পানীটোৰ ৮০ শতাংশতকৈ অধিক সামগ্ৰী চীনত নিৰ্মিত। প্ৰায় ২০ শতাংশ এপল আইফোন ভাৰতত নিৰ্মিত। ভাৰতত নিৰ্মিত আইফোনৰ বিপুল সংখ্যক আমেৰিকাৰ বজাৰত বিক্ৰী হয়।
এপলে ভাৰতকে ধৰি অন্য দেশত সামগ্ৰী নিৰ্মাণ বন্ধ কৰিব লাগে। ৰাষ্ট্ৰপতি ট্ৰাম্পে এইটোৱেই বিচাৰে। চলিত বৰ্ষৰ এপ্ৰিল মাহত হোৱাইট হাউছে এই কথা স্পষ্ট কৰি দিছিল। শেহতীয়াকৈ ট্ৰাম্পে এপলৰ চিইঅ’ কুককো সকীয়াই দিছিল, “আমি আপোনাৰ লগত ভাল কাম কৰি আহিছো। আপুনি চীনত নিৰ্মাণ কৰা উৎপাদন প্লাণ্টবোৰ আমি বছৰ বছৰ ধৰি সহ্য কৰি আহিছো। কিন্তু আপুনি ভাৰতত কাৰখানাবোৰ নিৰ্মাণ কৰা আমি পছন্দ নকৰো। ভাৰতে নিজৰ যত্ন ল’ব পাৰে আৰু তেওঁলোকে যথেষ্ট ভালদৰে চলি আছে।”
তেতিয়াও এপলে এই বিষয়ত সেই ধৰণে মাত মতা দেখা পোৱা নগ’ল। অৱশেষত আহিল ট্ৰাম্পৰ সতৰ্কবাণী।
