বলীউদৰ অভিনেতা সুশান্ত সিং ৰাজপুতৰ মৃত্যুৰ পাছতে তদন্তকাৰী সংস্থাৰ হাতলৈ অহা ড্ৰাগছ চক্ৰৰ ৰহস্য উদ্ধাৰত বহুদূৰ আগবাঢ়িছে নাৰক’টিক্স কন্ট্ৰ’ল ব্যুৰো (এন চি বি)।
ইতিমধ্যে এন চি বিয়ে এই সংক্ৰান্তত ২৪জনক গ্ৰেপ্তাৰ কৰিছে। তাৰ মাজতে দেওবাৰে এনচিবিয়ে ড্ৰাগছ চক্ৰৰ সৈতে সম্পৰ্কৰ বাবে গ্ৰেপ্তাৰ কৰে টিভি চিৰিয়েলৰ এগৰাকী জনপ্ৰিয় অভিনেত্ৰী প্ৰীতিকা চৌহানক।
গ্ৰেপ্তাৰ কৰাৰ পাছত অভিনেত্ৰীগৰাকীক বৰ্তমান ন্যায়িক জিম্মালৈ প্ৰেৰণ কৰা হৈছে।
অভিনেত্ৰীগৰাকীয়ে মুম্বাইৰ ভাৰছোভাৰ পৰা এজন লোকৰ পৰা মাৰিজুৱানা সংগ্ৰহ কৰাৰ অভিযোগ আছে। তদুপৰি, তেওঁৰ পৰা ৯৯গ্ৰাম গাঞ্জাও উদ্ধাৰ কৰা হৈছে। এই সংক্ৰান্তত ফইজল নামৰ এজন লোককো গ্ৰেপ্তাৰ কৰা হৈছে।
প্ৰীতিকা চৌহান টিভি চিৰিয়েলৰ এগৰাকী জনপ্ৰিয় অভিনেত্ৰী। ‘মা বৈষ্ণোদেৱী’ ‘চি আই ডি’, ‘সাৱধান ইণ্ডিয়া’, ‘সংকটমোচক মহাবলী হনুমান’ আদি চিৰিয়েলত তেওঁ অভিনয় কৰিছে। মহাবলী হনুমান চিৰিয়েলখনত প্ৰীতিকাই দেৱী সৰস্বতীৰ ভূমিকাত অবিনয় কৰিছিল।
২০০৫ চনত অভিনয় জীৱন আৰম্ভ কৰা প্ৰীতিকা হিমাচল প্ৰদেশৰ বাসিন্দা। তেওঁ সৰু পৰ্দাতেই মূলত: অভিনয় সীমিত ৰাখিছে।
যোৱা শুকুৰবাৰে কোকেইন সৰবৰাহকাৰীৰ সৈতে জড়িত থকাৰ অভিযোগত এনচিবিয়ে বলীউদৰ অভিনেতা অৰ্জুন ৰামপালৰ বান্ধৱীৰ ভাতৃক গ্ৰেপ্তাৰ কৰিছিল।
বলীউদ-ড্ৰাগছ সম্পৰ্কত বহুকেইগৰাকী তাৰকা ইতিমধ্যে জেৰাৰ সন্মুখীন হৈছে। তাৰ ভিতৰত দীপিকা পাডুকন, ছাৰা আলী খান, শ্ৰদ্ধা কাপুৰ, ৰাকুল প্ৰীত সিং আদি অন্যতম।
