কিশোৰীক হাৰাশাস্তি আৰু শাৰীৰিক নিৰ্যাতন চলোৱাৰ অভিযোগত গ্ৰেপ্তাৰ জনপ্ৰিয় অভিনেতা

ভাৰতীয় টেলিভিছনৰ জনপ্ৰিয় অভিনেতা ৰোহিত চাণ্ডেলক এগৰাকী ১৬ বছৰীয়া কিশোৰীক নিয়মিত হাৰাশাস্তি, অশালীন আচৰণ আৰু শাৰীৰিক নিৰ্যাতন চলোৱাৰ অভিযোগত গ্ৰেপ্তাৰ কৰা হৈছে। শুকুৰবাৰে পণ্ট নগৰ থানাই মুম্বাইৰ দহিছাৰ অঞ্চলৰ বাসগৃহৰ পৰা ২৯ বছৰীয়া অভিনেতাগৰাকীক গ্ৰেপ্তাৰ কৰে।

প্ৰাথমিক সোধা-পোছাৰ অন্তত তেওঁক বিশেষ POCSO আদালতত হাজিৰ কৰা হয়, য’ত ন্যায়াধীশে তেওঁক আৰক্ষীৰ জিম্মালৈ প্ৰেৰণ কৰাৰ নিৰ্দেশ দিয়ে। টেলিভিছন আৰু ৱেব ছিৰিজৰ চিনাকি মুখ ৰোহিতৰ বিৰুদ্ধে এনে গুৰুতৰ অভিযোগে মনোৰঞ্জন জগতখনত চাঞ্চল্যৰ সৃষ্টি কৰিছে।

আৰক্ষীক দাখিল কৰা এজাহাৰ অনুসৰি অভিনেতাগৰাকীৰ ভুক্তভোগী কিশোৰীগৰাকীৰ সৈতে পূৰ্বৰে পৰা চিনাকি আছিল। কিন্তু কিছুদিনৰ পৰা ৰোহিতে কিশোৰীগৰাকীক বিভিন্ন অচিনাকি নম্বৰৰ পৰা ফোন কৰি হাৰাশাস্তি কৰি আহিছিল।

অভিযোগ অনুসৰি, যোৱা ৫ জুলাইত কিশোৰীগৰাকীয়ে নিজৰ বাসগৃহত উপস্থিত হোৱাৰ সময়ত অভিনেতাগৰাকীয়ে তেওঁৰ বাট বন্ধ কৰি অশ্লীল ভাষাৰে গালি-গালাজ কৰিছিল। কিশোৰীগৰাকীয়ে প্ৰতিবাদ কৰাৰ সময়ত ৰোহিতে তেওঁক শাৰীৰিকভাৱেও নিৰ্যাতন কৰিছিল বুলি অভিযোগনামাত উল্লেখ কৰা হৈছে। ঘটনাৰ পিছতে পৰিয়ালৰ লোকে পন্ট নগৰ আৰক্ষী থানাত এজাহাৰ দাখিল কৰে।

মুম্বাই আৰক্ষীয়ে অভিযুক্ত অভিনেতাগৰাকীৰ বিৰুদ্ধে শিশু সুৰক্ষা আইন বা পকছো আইনৰ কঠোৰ ধাৰাত গোচৰ ৰুজু কৰিছে। লগতে ভাৰতীয় দণ্ডবিধিৰ অধীনত হাৰাশাস্তি আৰু ইচ্ছাকৃত শাৰীৰিক আক্ৰমণৰ অভিযোগৰো তদন্ত আৰম্ভ কৰা হৈছে।

১৯৯৫ চনত মহাৰাষ্ট্ৰত জন্মগ্ৰহণ কৰা ৰোহিত চাণ্ডেল টেলিভিছনৰ পৰ্দাত এক পৰিচিত নাম। প্ৰায় ৯০টা অডিচনত ব্যৰ্থ হোৱাৰ পিছত বিজ্ঞাপনৰ জৰিয়তে নিজৰ কেৰিয়াৰ আৰম্ভ কৰা অভিনেতাগৰাকীয়ে ‘পাণ্ডিয়া ষ্ট’ৰ’, ‘ছৈৰাব’, ‘কাশীবাই বাজীৰাও বল্লাল’ আদি জনপ্ৰিয় ধাৰাবাহিকত অভিনয় কৰিছে। তদুপৰি, তেওঁক ‘এস্কেপ লাইভ’ আৰু ‘চন্দ্ৰগুপ্ত মৌৰ্য’ৰ দৰে ধাৰাবাহিকতো গুৰুত্বপূৰ্ণ চৰিত্ৰত অভিনয় কৰা দেখা গৈছে।

অভিনয়ৰ জৰিয়তে জনপ্ৰিয়তাৰ শিখৰত উপনীত হোৱা অভিনেতাগৰাকীৰ এনে  অন্ধকাৰ দিশ পোহৰলৈ অহাত সহকৰ্মী আৰু অনুৰাগীসকলৰ মাজত তীব্ৰ প্ৰতিক্ৰিয়াৰ সৃষ্টি হৈছে।