সমগ্ৰ ৰাজ্য বানপানীৰ কবলত ককবকাই থকাৰ সময়তে বিহপুৰীয়াৰ দংগীবিলত টেলিকম প্ৰতিষ্ঠান এয়াৰটেলৰ দুগৰাকী কৰ্মী বিদ্যুস্পৃষ্ট হৈ মৃত্যুক সাবতিব লগা হোৱা ঘটনাই অঞ্চলটোত তীব্ৰ চাঞ্চল্যৰ সৃষ্টি কৰিছে।
বিদ্যুৎস্পৃষ্ট হৈ মৃত্যু হোৱা কৰ্মচাৰী দুগৰাকী বঙালমৰাৰ দৌলতপুৰৰ মঞ্জুৰ হুছেইন আৰু তফিজুল ইছলাম বুলি চিনাক্ত কৰা হৈছে।
ঘটনাৰ বিৱৰণী অনুসৰি বিহপুৰীয়াত বানপানীৰ ফলত এয়াৰটেলৰ টাৱাৰ সংযোগ হৈ থকা ট্ৰেন্সফৰ্মাৰৰ কিবা বিজুটি ঘটিছিল। এই যান্ত্ৰিক বিজুটি দূৰ কৰাৰ বাবে এয়াৰটেলৰ দুয়োগৰাকী কৰ্মচাৰীয়ে পানীৰ মাজত ট্ৰেন্সফৰ্মাৰটো মেৰামতি কৰি আছিল আৰু মেৰামতি কৰি থকা সময়তে বিদ্যুৎস্পৃষ্ট হৈ দুয়োগৰাকী কৰ্মচাৰীৰ থিতাতে মৃত্যু হয়।
উল্লেখযোগ্য যে, মৃত্যু হোৱা এয়াৰটেলৰ দুয়োগৰাকী কৰ্মচাৰীয়ে প্ৰতিষ্ঠানটোত ঠিকাভিত্তিক কৰ্মচাৰী হিচাপে কাম কৰিছিল।
পৰিয়ালৰ লগতে স্থানীয় লোকে সমগ্ৰ ঘটনাৰ উচিত তদন্তৰ দাবী কৰিছে আৰু ঘটনাস্থলীত আৰক্ষী উপস্থিত হৈ সমগ্ৰ ঘটনাৰ তদন্ত অব্যাহত ৰাখিছে বুলি খবৰ লাভ কৰা হৈছে।
অসম চৰকাৰৰ তৰফৰ পৰা বানপানীৰ সময়ত বিদ্যুৎ পৰিবাহী তাৰ, খুটা আদিৰ পৰা বাৰম্বাৰ জনসাধাৰণক আতৰত থকাৰ বাবে বিজ্ঞাপন প্ৰকাশ কৰি অহাৰ পাছতো এয়াৰটেলৰ কৰ্মী দুগৰাকীয়ে এনেদৰে প্ৰাণ হেৰুৱাবলগীয়া হোৱা ঘটনাত প্ৰতিষ্ঠানটোৰ দায়বদ্ধতাৰ ওপৰত জনসাধাৰণে প্ৰশ্ন উত্থাপন কৰিছে।
