শেহতীয়াকৈ ৰাজ্যৰ পৰা কোনো হাতী কঢ়িয়াই নিয়া হোৱা নাই বুলি অসমৰ মুখ্যমন্ত্ৰীৰ কাৰ্যালয়ে অস্বীকাৰ কৰাৰ পাছতো সোমবাৰে ৰিলায়েন্স ইণ্ডাষ্ট্ৰীজৰ ব্যক্তিগত চিৰিয়াখানা বানতাৰালৈ অসমৰ দুটা হাতী স্থানান্তৰ কৰা হয়।
পশ্চিম বংগৰ মায়াপুৰৰ ইণ্টাৰনেশ্যনেল ছ’চাইটি ফৰ কৃষ্ণ চেতনাৰ (ISKCON)ৰ তত্বাৱধানত থকা বিষ্ণুপ্ৰিয়া (১৮) আৰু লক্ষ্মীপ্ৰিয়া (২৬)ক উদ্যোগপতি মুকেশ আম্বানীৰ কনিষ্ঠ পুত্ৰ অনন্ত আম্বানীৰ মালিকানাধীন জামনগৰৰ বান্তাৰালৈ প্ৰেৰণ কৰা হয়।
ইস্কোন মন্দিৰৰ জ্যেষ্ঠ সদস্য হৃমতী দেৱী দাসে ছ’চিয়েল মিডিয়া পোষ্টত কয় যে, “আপোনালোক সকলোৱে জানে যে আমাৰ মৰমৰ হাতী মায়াপুৰৰ পৰা চিৰদিনৰ বাবে গৈছে। বিষ্ণুপ্ৰিয়া আৰু এজন মাউতৰ সৈতে সংঘটিত হোৱা এক দুৰ্ঘটনাৰ বাবে যোৱা বছৰ মায়াপুৰ পৰিচালনা সমিতিয়ে সিদ্ধান্ত লৈছিল যে দুয়োটা হাতীক স্থানান্তৰিত কৰিব লাগে। যোৱা ১৮ বছৰ ধৰি হাতীক সেৱা আগবঢ়োৱাৰ বাবে মই বিষ্ণুপ্ৰিয়া আৰু লক্ষ্মীপ্ৰিয়াক পঠিয়াবলৈ অতি অনিচ্ছুক আছিলো। অৱশ্যে এই ২৯ বছৰীয়া অনন্ত আম্বানীয়ে মোক পতিয়ন নিয়াইছিল যে আমাৰ হাতীবোৰৰ বাবে বানতাৰা সৰ্বোত্তম।’’
অৱশ্যে অসমক এনে কাৰ্যকলাপৰ সৈতে জড়িত কৰা বাতৰি আৰু ছ’চিয়েল মিডিয়াত প্ৰকাশ কৰা বাতৰি আৰু ছ’চিয়েল মিডিয়াত প্ৰকাশ কৰা পোষ্টক “অযুক্তিকৰ আৰু মিছা” বুলি উল্লেখ কৰি অসমৰ চিএমঅ’ই সোমবাৰে ৰাজ্যখনৰ পৰা কোনো হাতী কঢ়িয়াই নিয়া হোৱা নাই বুলি উল্লেখ কৰে।
ইস্কন মায়াপুৰে ২০০৭ চনত লক্ষ্মীপ্ৰিয়া আৰু ২০১০ চনত বিষ্ণুপ্ৰিয়া অধিগ্ৰহণ কৰি মন্দিৰৰ অনুষ্ঠান আৰু উৎসৱৰ বাবে ব্যৱহাৰ কৰিছিল।
প্ৰথমে হাতী কেইটা অসমৰ তিনিচুকীয়া জিলাৰ মলিন মৰাণৰ আছিল, যিয়ে ২০১৫ চনত ইস্কন মায়াপুৰক গতাই দিছিল।
মৰাণে শপতনামাত অসমত হাতীকেইটাৰ ৰক্ষণাবেক্ষণত অক্ষম বুলি উল্লেখ কৰি ইস্কন মায়াপুৰৰ পূৰ্ণকালীন যত্নৰ দায়িত্ব অৰ্পণ কৰে।
হাতীকেইটা ইস্কনক গতাই দিয়াৰ সময়ত মৰাণে শপতনামাত এই কথাও উল্লেখ কৰিছিল যে তেওঁ হাতীকেইটা আন কোনো ব্যক্তিক বিক্ৰী কৰা নাই আৰু বন্যপ্ৰাণী সুৰক্ষা আইনৰ কোনো বিধান উলংঘা কৰা নাই।
