সোমবাৰে পুৱা দৰঙৰ ধূলাত ১৫ নং ৰাষ্ট্ৰীয় ঘাইপথত সংঘটিত হোৱা এক ভয়ংকৰ পথ দুৰ্ঘটনাত দুজনৰ মৃত্যু ঘটিছে আৰু আন কেইবাজনো লোক আহত হৈছে।
বাতৰি অনুসৰি, এ এছ ২০ ২২৮৯ পঞ্জীয়ন নম্বৰৰ আল্ট্ৰা বাছখন তেজপুৰৰ পৰা গুৱাহাটী অভিমুখে আহি থকা অৱস্থাত দুৰ্ঘটনা পতিত হয়।
ঘটনাৰ খবৰ লাভ কৰাৰ লগে লগে ধূলা আৰক্ষীয়ে ঘটনাস্থলীত উপস্থিত হৈ গাড়ীখন জব্দ কৰি মৃতদেহ দুটা মৰণোত্তৰ পৰীক্ষাৰ বাবে মঙলদৈ অসামৰিক চিকিৎসালয়লৈ লৈ যায়। মৃতকৰ পৰিচয় এতিয়াও জানিব পৰা হোৱা নাই।
প্ৰত্যক্ষদৰ্শীৰ ভাষ্যৰ পৰা অনুমান কৰা হৈছে যে দুৰ্ঘটনাটো অতি ভয়াৱহ আছিল, বাছখনৰ ভিতৰৰ পৰা ৰক্তাক্ত হৈ পৰি থকা মৃতদেহ উদ্ধাৰ কৰা হৈছে। বৰ্তমান আৰক্ষীয়ে দুৰ্ঘটনাটোৰ তদন্ত অব্যাহত ৰাখিছে।
ইপিনে, ধূলা আৰক্ষীয়ে থানা চৌহদত সংবাদ মাধ্যমক প্ৰৱেশ কৰিব নিদিয়াৰ ফলত সাংবাদিকসকলে সৱিশেষ তথ্য সংগ্ৰহ কৰাত অসুবিধাৰ সন্মুখীন হয়। আৰক্ষীৰ জ্যেষ্ঠ বিষয়াসকলো থানাত গৈ উপস্থিত হয়৷
দুৰ্ঘটনাৰ কাৰণ তথা অধিক সবিশেষ তথ্যৰ বাবে অপেক্ষা কৰা হৈছে।
