নিৰ্বাচনৰ দিন চমু চাপি অহাৰ লগে লগে ব্যপক তৎপৰ হোৱা পৰিলক্ষিত হৈছে বিভিন্ন ৰাজনৈতিক দল তথা নেতা কৰ্মী সকলোৰ মাজত। এইক্ষেত্ৰত পিছ পৰি থকা নাই নতুনকৈ গঠন হোৱা অসম জাতীয় পৰিষদো।
দেওবাৰে বঙাইগাঁও জিলাৰ ৩৪ নং অভয়াপুৰী উত্তৰ বিধান সভা সমষ্টিৰ অন্তৰ্গত মাণিকপুৰত অসম জাতীয় পৰিষদ দলৰ অভয়াপুৰী উত্তৰ বিধান সভা সমষ্টিৰ সমষ্টি কমিটি গঠনৰ বাবে এখন সভাৰ আয়োজন কৰা হয়।
সভাৰ সভাপতি হিচাপে আমিনুল ইছলামক দায়িত্ব দিয়াত মঞ্চতেই এক বিতৰ্কৰ সৃষ্টি হয়। পিছত সভা পৰিচালনাৰ বাবে সভানেত্ৰী হিচাপে দায়িত্ব দিয়া হয় তত্ত্বাৱধায়ক হিচাপে অহা অপৰাজিতা বৰাক।
সভানেত্ৰী অপৰাজিতা বৰাৰ নেতৃত্বত অনুষ্ঠিত সভাত উপস্থিত আছিল কেন্দ্ৰীয় সমিতিৰ উপ সভাপতি তথা প্ৰাক্তন বিধায়ক মকবুল হুছেইনৰ লগতে ৰবিন দত্তকে ধৰি আন আন বিষয়ববীয়া সকল।
সভাত কেন্দ্ৰীয় সমিতিৰ উপ-সভাপতি তথা ৰাইজৰ দলৰ পৰা অভয়াপুৰী উত্তৰ বিধান সভা সমষ্টিৰ প্ৰাৰ্থিত্বৰ প্ৰত্যাশী তথা প্ৰাক্তন বিধায়ক মকবুল হুছাইন উপস্থিত থাকি ভাষণত কয় যে এই দল কেৱল মিঞাৰ দল নহয়, কিন্তু আজিৰ সভাত কেৱল মিঞাই উপস্থিত থকা পৰিলক্ষিত হৈছে।
ইফালে আন এজনী প্ৰাৰ্থিত্ব প্ৰত্যাশী অজন্তা বৰুৱাও উপস্থিত থাকে সভাত। সভাত সমষ্টি কমিটি গঠনৰ বাবে সমষ্টি কমিটিৰ সভাপতি হিচাপে দুয়োজন প্ৰাৰ্থিত্ব প্ৰত্যাশীয়ে নিজৰ নিজৰ পছন্দৰ প্ৰাৰ্থিৰ লগতে সমৰ্থনকাৰীক লগত লৈ আহে।
সমষ্টি কমিটিৰ সভাপতি হিচাপে একাংশই আমিনুল ইছলামক সমৰ্থন কৰে যদিও আন একাংশই মহম্মদ আলীক সমৰ্থন জনায়। ইয়াৰ লগে লগে দুটা ফৈদৰ সংঘাত স্পষ্ট ভাৱ প্ৰকাশ পায় আৰু সভাত উত্তেজনাৰ সৃষ্টি হয়।
দুয়ো পক্ষৰ মাজত তুমুল তৰ্ক বিতৰ্ক আৰম্ভ হয়। শেষত তৰ্ক-বিতৰ্কৰ মাজেৰে আমিনুল ইছলামক সমষ্টি কমিটিৰ সভাপতি হিচাপে লৈ এখন তদৰ্থক সমষ্টি কমিটি গঠন কৰা হয়।
সভাত উত্তপ্ত পৰিস্থিতি সম্পৰ্কে বঙাইগাওঁ জিলা সমিতিৰ নেতা মসিউৰ ৰহমানক সাংবাদিকে কৰা প্ৰশ্নৰ উত্তৰত কয় যে এয়া প্ৰাক্তন বিধায়ক মকবুল হুছাইনৰ বাবেই এনে অবাঞ্চিত ঘটনাৰ সৃষ্টি হৈছে।
ইফালে সাংবাদিকৰ আগত লগে লগে মকবুল হুছাইনে কয় যে সভাত কোনো ধৰণৰ অবাঞ্চিত ঘটনাৰ সৃষ্টি হোৱা নাই আৰু বৰ নিয়াৰিকৈ সভাখন সম্পন্ন হৈছে। কিন্তু প্ৰাক্তন বিধায়ক মকবুল হুছেইন আহ্বায়ক সমিতিৰ ওপৰত নাৰাজ হোৱা বুলি জানিব দিয়ে। লগতে মকবুল হুছাইন অহা ২০২১ বৰ্ষৰ বিধান সভা নিৰ্বাচনৰ অভয়াপুৰী উত্তৰ বিধান সভা সমষ্টিৰ প্ৰাৰ্থিত্বৰ প্ৰত্যাশী বুলি জানিব দিয়ে।
সভাত উত্তপ্ত পৰিস্থিতি তথা নেতা কৰ্মী সকলৰ মাজত অমিল থকাৰ বাবে অসম জাতীয় পৰিষদ দলৰ প্ৰতি থকা আগ্ৰহী একাংশ যুৱকে নেতা কৰ্মী সকলক তীব্ৰ বাক্যবান নিক্ষেপ কৰি কয় যে আমি এই দলৰ প্ৰতি আগ্ৰহী আছিলো যাৰ বাবেই সকলো এৰি আজিৰ এই সভাত উপস্থিত হৈছো। কিন্তু দুৰ্ভাগ্যজনক কথা যে আপোনালোকৰ আচৰণত আমি অসন্তুষ্ট।
নতুনকৈ গঠন হোৱা দলটোৰ একাংশ নেতাৰ বাবেই হয়তো ৰাইজে আঁকোৱালি ল’বলৈ সংকুচ অনুভৱ কৰিব বুলি বহুতে ধাৰণা কৰিছে।
