সাংবাদিক চিকিৎসা কল্যাণ আঁচনিৰ অধীনত শুকুৰবাৰে নগাঁৱত দুজন সাংবাদিকক চিকিৎসা সেৱা গ্ৰহনৰ আৰ্থিক সাহাৰ্য্যৰ চেক প্ৰদান কৰা হয়।নগাঁও জিলা উপায়ুক্তৰ সভাকক্ষত আয়োজিত এক অনুষ্ঠানত চেক প্ৰদান কৰি জিলা উপায়ুক্ত যাদৱ শইকীয়াই অসম চৰকাৰে সাংবাদিকৰ কল্যাণৰ হকে গ্ৰহণ কৰা বিভিন্ন আঁচনিৰ বিষয়ে ব্যাখ্যা দাঙি ধৰে।
উপায়ুক্ত গৰাকীয়ে এই আচঁনিৰ দ্বাৰা সাংবাদিক সকল কিছু পৰিমানে হ’লেও উপকৃত হ’ব বুলি উল্লেখ কৰি কয় যে সাংবাদিক সকলে চৰকাৰে গ্ৰহণ কৰা আচঁনিসমূহৰ সুবিধা গ্ৰহণ কৰা উচিত।
উক্ত অনুষ্ঠানত প্ৰতিদিন টাইম আৰু পূৰ্বাঞ্চল প্ৰহৰীৰ নগাঁৱৰ সংবাদদাতা ক্ৰমে বীৰেন বৰাক ৫০,০০০ হাজাৰ আৰু ৰবীন্দ্ৰ সাহক ২৫,০০০ হাজাৰ টকাৰ চিকিৎসাৰ বাবে আৰ্থিক সাহায্যৰ চেক প্ৰদান কৰে। অনুষ্ঠানত জিলা জনসংযোগ বিষয়া সমৰ কলিতাই সাংবাদিক চিকিৎসা কল্যাণ আঁচনিৰ বিষয়ে বিবৰি কয়।
ইপিনে,অনুষ্ঠানত অংশগ্ৰহণ কৰি নগাঁৱৰ সাংবাদিকসকলে চৰকাৰৰ এই পদক্ষেপক আদৰণি জনায়। উল্লেখ্য যে,নগাঁও জিলাত চলিত বিত্তীয় বৰ্ষত পাঁচ জন সাংবাদিকে এই সুবিধা লাভ কৰিছে।
