সমগ্ৰ ৰাজ্যতে বানপানীৰ ভয়াৱহতাৰ মাজতে যোৱা নিশা নগাঁৱৰ কামপুৰত সংঘটিত হৈছে এক শোকাৱহ ঘটনা৷ অঞ্চলটোত নিশা বাঢ়নী পানীত উটি গৈছে তদন্তৰ বাবে যোৱা কামপুৰ আৰক্ষী থানাৰ দুজন আৰক্ষী৷
কামপুৰৰ মধুপুৰ অঞ্চলৰ ওচৰত এটা গোচৰৰ তদন্তৰ বাবে গৈছিল কামপুৰ আৰক্ষীৰ এটা তিনিজনীয়া দল। কিন্তু অসাৱধানৱশত: বাঢ়নী পানীত পৰি যায় ভাৰপ্ৰাপ্ত বিষয়া সমূজ্জ্বল কাকতিৰ লগতে কনিষ্টবল ৰাজীৱ বৰদলৈ।
লগে লগে ঘটনাস্থলীত উপস্থিত স্থানীয় ৰাইজে দুয়োকে উদ্ধাৰৰ চেষ্টা কৰে যদিও পানীৰ সোঁতত উটি যায় দুয়োগৰাকী আৰক্ষী। ঘটনাৰ খবৰ পোৱাৰ লগে লগে ঘটনাস্থলীত উপস্থিত হয় আৰক্ষীৰ লগতে SDRF-NDRF বাহিনী।
পুৱতি নিশালৈ কনিষ্টবল ৰাজীৱ বৰদলৈৰ মৃতদেহ উদ্ধাৰ কৰে যদিও এইপৰ্যন্ত সন্ধানহীন হৈ আছে ভাৰপ্ৰাপ্ত বিষয়া সমুজ্জ্বল কাকতি। বৰ্তমানেও NDRF আৰু SDRF বাহিনীৰ লোকে অব্যাহত ৰাখিছে উদ্ধাৰ অভিযান।
কামপুৰ আৰক্ষী থানাৰ আৰক্ষীয়ে জানিবলৈ দিয়া অনুসৰি নিখোজ আৰক্ষী বিষয়া কাকতিয়ে কিছুদিন পূৰ্বেহে কামপুৰ আৰক্ষী চকীত যোগদান কৰিছিল।
