অসম আৰক্ষীৰ হাতত পুনৰ গ্ৰেপ্তাৰ হৈছে ৰোহিংগিয়া নাগৰিক। হাইলাকান্দিত আৰক্ষীৰ জালত ধৰা পৰিছে দুগৰাকী ৰোহিংগিয়া নাগৰিক। হাইলাকান্দি জিলাৰ ধলছেড়া গাঁৱৰ পৰা লালা আৰক্ষীয়ে গ্ৰেপ্তাৰ কৰা ৰোহিংগিয়া নাগৰিক দুগৰাকীৰ নাম হ’ল আবুল হালিম আৰু লুবেদা বেগম।
দুয়োগৰাকী ৰোহিংগিয়া নাগৰিকে অবৈধভাৱে সীমান্ত পাৰ হৈ ম্যানমাৰৰ পৰা ভাৰতত প্ৰৱেশ কৰাৰ সময়ত আৰক্ষীৰ জালত পৰে। আৰক্ষীৰ প্ৰাথমিক তদন্তত দুয়োগৰাকী লোকৰ ঘৰ ম্যানমাৰৰ মণ্ডু থানাৰ কুঙ্কাৰগাড়া গাঁৱত বুলি জানিব পৰা গৈছে।
ঘটনাৰ বিৱৰণি মতে, হাইলাকান্দিৰ ধলছেড়া গাঁৱৰ হবিবুৰ ৰহমান নামৰ এগৰাকী ব্যক্তিৰ ঘৰত শিলচৰৰ সোনাই অঞ্চলৰ এজন ব্যক্তিয়ে নিজৰ আত্মীয় বুলি পৰিচয় দি ৰোহিংগিয়া নাগৰিক দুগৰাকীক লৈ আহিছিল। পাছত হাবিবুৰ ৰহমানৰ তেওঁলোকৰ চালচলনত সন্দেহ ওপজাত আৰক্ষীক খবৰ দিয়ে।
ৰহমানে দিয়া খবৰৰ ভিত্তিত অভিযান চলাই আৰক্ষীয়ে ৰোহিংগিয়া লোকদুগৰাকীৰ লগতে শিলচৰৰ ব্যক্তিজনকো আটক কৰে। আৰক্ষীয়ে আৰু অধিক তদন্তৰ বাবে শিলচৰৰ ব্যক্তিজনৰ নাম প্ৰকাশ কৰাৰ পৰা বিৰত আছে।
উল্লেখযোগ্য যে, বিগত সময়ত অসমৰ বিভিন্ন স্থানত আৰক্ষীয়ে অভিযান চলাই বহুতো ৰোহিংগিয়া নাগৰিকক আটক কৰিবলৈ সক্ষম হৈছে। ৰোহিংগিয়া সকলক ভাৰতলৈ লৈ অহাৰ ক্ষেত্ৰত এটা আন্তঃৰাষ্ট্ৰীয় চক্ৰ জড়িত হৈ আছে বুলি আৰক্ষীয়ে সন্দেহ প্ৰকাশ কৰিছে। আৰক্ষীৰ সম্পুৰ্ণ তদন্তত সকলো কথা পোহৰলৈ আহিব বুলি আশা কৰা হৈছে।
